1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

’ریو‘ کی باکس آفس پر شاندار کامیابی

19 اپریل 2011

ابتدائی اعداد و شمار کے مطابق اینیمیٹڈ کامیڈی فلم Rio نے اپنی ریلیز کے پہلے ہی ہفتے میں باکس آفس پر ریکارڈ بزنس کیا ہے۔

https://p.dw.com/p/10vtU
تصویر: 2011 Twentieth Century Fox

اس فلم نے پہلے تین دنوں میں چالیس ملین ڈالر کا بزنس کیا جبکہ دنیا بھر کے شائقین اس فلم میں اپنی دلچسپی کا اظہار کر رہے ہیں اور یہ دلچسپی ابھی تک کم نہیں ہوئی۔

تھری ڈی کارٹون فلم رِیو میں ’سوشل نیٹ ورک‘ کے سٹار جیسی آئزنبرگ نے اپنی آواز کا جادو جگایا ہے۔ رواں برس ریلیز ہونے والی دیگر فلموں کے مقابلے میں اس فلم نے اپنے ابتدائی چند دنوں میں ہی تمام بزنس ریکارڈ توڑ دیے ہیں۔ اس سے قبل رواں برس اینیمیٹڈ فلم ’رانگو‘ نے اپنی ریلیز کے پہلے ہی ہفتے کے دروان دو ملین ڈالر کا بزنس کیا تھا۔

رِیو نامی یہ فلم بچوں اور بڑوں دونوں ہی طرح کے شائقین کی یکساں دلچسپی کا باعث بن رہی ہے۔ مختلف ذرائع سے حاصل ہونے والے اعداد و شمار کے مطابق اس فلم کو دیکھنے کے لیے آنے والوں میں پچاس فیصد بچے ہوتے ہیں تو پچاس فیصد ہی بالغ فلم بین۔ تاہم ابھی تک خواتین اس فلم میں کچھ زیادہ ہی دلچسپی لے رہی ہیں۔

Film Filmszene Rio
رِیو نامی یہ فلم بچوں اور بڑوں دونوں ہی طرح کے شائقین کی یکساں دلچسپی کا باعث بن رہی ہےتصویر: 2011 Twentieth Century Fox

اس فلم کے ہدایتکار کارلوس سالدانا ہیں۔ اس فلم کی کہانی Blu نامی ایک ایسے پالتو طوطے کے گرد گھومتی ہے، جسے اڑنے کا کوئی شوق نہیں اور وہ امریکی ریاست Minnesota کے ایک چھوٹے سے قصبے میں خوشی سے زندگی بسر کر رہا ہو تا ہے کہ اس کی ملاقات اپنی ہی نسل کے Jewel نامی ایک مادہ پرندے سے ہوتی ہے۔ پھر یہ دونوں پرندے اپنے خوابوں کی تلاش میں اڑ کر ریو ڈی جینیرو جاتے ہیں، جہاں انہیں مختلف قسم کی مشکلات پیش آتی ہیں۔

اس اینیمیٹڈ فلم میں جدید ٹیکنالوجی کی مدد سے ایک ایسا سماں باندھا گیا ہے کہ فلم بین بس اس میں کھو ہی جاتا ہے۔ ناقدین کے بقول اس فلم نے سینما گھروں کو خیر باد کہہ دینے والوں کو بھی واپس سینماؤں میں پہنچا دیا ہے۔

رپورٹ: عاطف بلوچ

ادارت: مقبول ملک

اس موضوع سے متعلق مزید سیکشن پر جائیں

اس موضوع سے متعلق مزید