'رمضان ڈینش سماج پر منفی اثرات ڈالے گا، مسلمان چھٹی لے لیں‘

ڈنمارک میں سینٹر رائٹ لبرل پارٹی کی رکن اور مہاجرت اور سماجی انضمام کی وزیر اِ نگر اسٹوژبرگ کا یہ بیان مسلمانوں کے نزدیک مقدس اور عبادت کے مہینے رمضان کی آمد کے بعد سامنے آیا ہے۔

اسٹوژبرگ نے ڈینش اخبار بی ٹی ٹیبلائڈ میں شائع ہوئے اپنے ایک کالم میں لکھا ہے کہ ڈنمارک میں رہنے والے مسلمان اس مہینے کے دوران اپنے دفاتر سے رخصت لے لیں کیونکہ روزہ رکھ کر کام پر آنے سے ڈینش معاشرے اور عوام پر اچھے اثرات مرتب نہیں ہوں گے۔

انگر اسٹوژبرگ اپنے اس کالم میں لکھتی ہیں،’’مجھے حیرت ہے کہ مذہب اسلام کا چودہ سو سال سے زیادہ پرانا یہ مذہبی حکم آج سن 2018 میں ڈینش لیبر مارکیٹ اور سوسائٹی کے ساتھ کیسےمطابقت رکھ سکتا ہے۔‘‘

ڈینش وزیر برائے مہاجرت و سماجی انضمام نے یہ بھی لکھا کہ انہیں روزہ رکھنے والے افراد کی سلامتی اور پیداواری صلاحیت پر تحفظات ہیں۔

اس حوالے سے انہوں نے ایک بس ڈرائیور کی مثال بھی دی جس نے دس گھنٹوں سے کچھ کھایا پیا نہ ہو۔ انگر اسٹوژبرگ نے ایسے روزہ دار ڈرائیور کی مثال دیتے ہوئے لکھا، ’’یہ ہم سب کے لیے خطرناک ہو سکتا ہے۔‘‘

اسٹوژبرگ کی اس مہاجرین مخالف سوچ نے گزشتہ برس اس وقت ایک متنازعہ بحث کا آغاز کیا تھا، جب انہوں نے مہاجرت کے قوانین کو سخت بنانے کے پچاسویں اقدام کی خوشی مناتے ہوئے فیس بک پر کیک کے ساتھ اپنی مسکراتی تصویر پوسٹ کی تھی۔

گزشتہ پندرہ سالوں میں ڈنمارک کی حکومت نے تارکین وطن کے حوالے سے اپنی پالیسیوں کو سخت تر کیا ہے۔ حکومت کا موقف ہے کہ تارکین وطن کو ملکی لیبر مارکیٹ کا کارآمد حصہ بننے کے لیے ڈینش زبان اور رسم و رواج سیکھنا لازمی ہے۔

ص ح/ اے ایف پی