دیوالی، روشنیوں کا تہوار

دیوالی کے موقع پر زیادہ تر خواتین اپنے ہاتھوں پر مہندی کے خوبصورت ڈیزائن بنواتی ہیں۔ اسی وجہ سے اچھی مہندی لگانے والوں کو تلاش کرنا بھی ایک مشکل کام ہوتا ہے۔ یہ ان کے لیے پیسے کمانے کا سال کا بہترین موقع ہوتا ہے۔

زیادہ تر ہندو اس بات پر یقین رکھتے ہیں کہ دیوالی سے قبل سونا خریدنا خوش قسمتی کی نشانی ہوتا ہے اور اس سے دولت آتی ہے۔ اسی وجہ سے اس روز دولت اور خوشحالی کی دیوی لکشمی کی پوجا کی جاتی ہے۔

دیوالی کے روز فرش پر رنگ برنگی تصاویر بنائی جاتی ہیں۔ روایتی طور پر یہ تصاویر گھر کے مرکزی دروازے کے قریب نقش کی جاتی ہیں۔ اس کے علاوہ گھروں میں دیے جلائے جاتے ہیں اور خصوصی تزئین و آرائش کی جاتی ہے۔

آتش بازی اور پٹاخوں کو دیوالی کا لازمی حصہ سمجھا جاتا ہے۔

دیوالی ایک ایسا تہوار ہے جسے کنبے کے تمام افراد مل کر مناتے ہیں۔ اس موقع پر تحائف کا تبادلہ ہوتا ہے اور مٹھائی تقسیم کی جاتی ہے۔ یہ تہوار ہر سال وسط اکتوبر سے وسط نومبر کے درمیان کسی دن منایا جاتا ہے۔

پہلے دیوالی کے روز گھروں اور گلیوں کو روشن کرنے کے لیے ہاتھ سے بنائے گئے دیے استعمال کیے جاتے تھے۔ تاہم اب ان کی جگہ چین سے درآمد کردہ سستے چراغوں نے لے لی ہے۔ اس کے بعد سے بھارت میں ہاتھ سے دیے بنانے والے افراد کا کاروبار خطرے سے دوچار ہو گیا ہے۔

بہت سے لوگ اس بات پر یقین رکھتے ہیں کہ دیوالی کے روز اگرآپ کسی کے گھر تحفہ لیے بغیر جائیں تو اس کا مطلب یہ سمجھا جاتا ہے کہ آپ میزبان کی خوش قمستی نہیں چاہتے۔ اس موقع پر بہت سی کمپنیاں اپنے ملازمین میں تحائف تقسیم کرتی ہیں یا انہیں اضافی رقم دی جاتی ہے۔

بھارت میں دیوالی صرف ہندو ہی نہیں مناتے۔ یہ تصویر بھارتی ریاست اتر پردیش کے شہر مرزا پور کی ہے، جہاں دیوالی کے موقع پر مسلمان بچیاں آپس میں بھائی چارے کے لیے دعا کر رہی ہیں۔ بھارت میں اقلیتوں سے تعلق رکھنے والے افراد بھی دیوالی کے روز خوشیاں مناتے ہیں۔