خیرات کی تقسیم کے موقع پر بھگدڑ، کم از کم دس خواتین ہلاک

بنگلہ دیش میں ایک مقامی کاروباری شخصیت کی جانب سے رمضان سے قبل زکواة کی تقسیم کے موقع پر بھگدڑ مچ جانے کے نتیجے میں کم از کم دس خواتین ہلاک ہوگئی ہیں۔ خبر رساں ادارے روئٹرز نے بنگلہ دیشی پولیس کے حوالے سے بتایا ہے کہ اس بگھدڑ کے نتیجے میں 50 سے زائد افراد زخمی بھی ہوئے ہیں۔

مقامی روایات کے مطابق مسلمانوں کے مقدس مہینے رمضان کے آغاز سے قبل لوگ زکواة کی ادائیگی کے طور پر اشیاء اور پیسے تقسیم کرتے ہیں۔ رواں ہفتے بدھ یا جمعرات سے ماہ رمضان کا آغاز ہونا ہے۔

بنگلہ دیش: مفت خوراک کی تقسیم کے وقت بھگدڑ، دس افراد ہلاک

چٹاگانگ کے ایک سینیئر پولیس اہلکار رفیق العالم کے مطابق بھگدڑ مچنے کا یہ واقعہ چٹاگانگ کے ایک علاقے میں اس وقت پیش آیا، جب مقامی اسٹیل مل کے ایک مالک کے گھر کے باہر غریبوں میں کپڑے اور دیگر اشیاء تقسیم کی جا رہی تھیں۔ پولیس کے مطابق اس موقع پر دس سے بارہ ہزار افراد یہ اشیاء لینے کے لیے جمع تھے۔

رفیق العالم نے خبر رساں ادارے روئٹرز کو بتایا، ’’وہاں 10 سے 12 ہزار کے قریب لوگ جمع تھے جن میں خواتین اکثریت میں تھیں۔ زکواة کے حصول کے لیے یہ لوگ ایک دوسرے سے آگے بڑھنے کی کوشش کر رہے تھے جس کے نتیجے میں وہاں بھگڈر کا واقعہ پیش آیا۔‘‘

پولیس کے مطابق زخمی ہونے والے افراد کو ایک قریبی ہسپتال میں طبی امداد فراہم کی گئی اور اس کے بعد انہیں گھر جانے کی اجازت دے دی گئی۔

بنگلہ دیش کے جنوبی بندرگاہی شہر چٹاگانگ میں گزشتہ برس دسمبر میں بھی اسی نوعیت کا ایک واقعہ پیش آیا تھا جب شہر کے ایک سابق میئر کے خاندان کی طرف سے ایک مقامی سماجی مرکز میں  ضرورت مند شہریوں میں مفت خوراک کے پیکٹ تقسیم کرنے کے موقع پر بھگدڑ مچ جانے کے نتیجے میں کم از کم 10 افراد ہلاک ہو گئے تھے۔

ا ب ا / ع ت (روئٹرز)