خلیجی ریاستیں عراق سے امریکی فوجی انخلاء کے بعد ایران کے اثرو رسوخ سے خائف

گلف ریسرچ سنٹر کے چیئرمین عبدالعزیز ساغر نے بھی اسی مؤقف کی تائید کرتے ہوئے کہا کہ امریکہ اور خلیجی ممالک کے مفادات مشترک ہیں اور وہ سکیورٹی معاہدوں پر بھی کاربند ہیں۔ ان کا مزید کہنا تھا کہ امریکہ کی اس خطے میں موجودگی اور دفاعی قابلیت نے ان عرب ممالک کو سلامتی اور استحکام کا احساس دلایا ہے اور اب یہاں سے امریکی دستوں کے انخلاء کے بعد عراق میں ایران کا فوجی اور انٹیلی جنس اثرو رسوخ بڑھ سکتا ہے۔

عراق میں نو برس کی موجودگی کے بعد امریکہ اپنے بقیہ فوجی دستوں کے انخلاء کا مرحلہ رواں برس کے اختتام تک مکمل کر لے گا۔ موجودہ سال عرب دنیا کے لیے نمایاں تبدیلیوں کا پیش خیمہ ثابت ہوا ہے ۔ مصر، تیونس اور لیبیا میں تین مضبوط آمروں کے ادوار کا خاتمہ ہوا تاہم ان انقلابی تبدیلیوں کے نتیجے میں خطے میں فرقہ بندی اور مذہبی تقسیم بھی پروان چڑھی ہے۔ خلیجی عرب ممالک اس بات پر تشویش میں مبتلا ہیں کہ اب ایران عراق میں شیعہ حکومت اور اس کے ساتھ ساتھ بڑے پیمانے پر دیگر عرب ریاستوں بشمول سعودی عرب اور بحرین جہاں سنی حکومت ہے، کے ساتھ کیا رویہ اپناتا ہے۔

ساغر کے مطابق عراق کو ایران سے براہ راست کوئی خطرہ نہیں ہے البتہ ایران کی حریف دیگر سنی خلیجی ریاستیں ان حالات سے متاثر ہو سکتی ہیں۔ ان کا کہنا تھا کہ عراق اور ایران کے مشترکہ مذہبی روابط بھی ہیں اور دونوں ممالک نے عالمی اور علاقائی دباؤ کو نظر انداز کرتے ہوئے شام کی موجودہ صورتحال کے حوالے سے بھی یکساں مؤقف اپنایا ہے۔ اسی طرح اگر سیاسی اعتبار سے جائزہ لیں تو امریکی انخلاء کے بعد عراق میں سعودی عرب اور ترکی کے مکمل طور پر غیر مؤثر ہونے سے ایران کے ساتھ روابط کا فروغ عراق کے لیے بھی ضروری تصور کیا جائے گا۔

دوسری طرف امریکی حکام نے اس حوالے سے دلیل دی ہے کہ ایران عراق میں اپنا اثر و رسوخ قائم نہیں کر سکتا کیونکہ موجودہ حالات میں ایران اپنے اقدامات کے باعث باقی دنیا سے کٹ کر علیحدگی کی جانب بڑھ رہا ہے۔ امریکہ کے نیشنل سکیورٹی ایڈوائیزر ٹام ڈانیلن نے گزشتہ ماہ کہا تھا کہ خطے میں اقتدار کا توازن ایران کے موافق نہیں ہے۔ ان کا یہ بھی کہنا تھا کہ ایران اور عراق اپنے مستقبل کے حوالے سے الگ الگ نظریات کے حامل ممالک ہیں۔ دوسری جانب 2003ء میں امریکہ کی آمد کے بعد سیاسی عدم استحکام اور خونریز فرقہ ورانہ فسادات کے شکار عراق میں مقامی سکیورٹی فورسز ملک کا کنٹرول سنبھالنے سے خوفزدہ ہیں۔

امریکہ کے آفس آف سکیورٹی کوآپریشن عراق کے سربراہ لیفٹیننٹ جنرل رابرٹ کیسلن نے خبررساں ادارے اے ایف پی کو اس حوالے سے بتایا کہ گزشتہ آٹھ برسوں کے دوران عراقی سکیورٹی فورسز نے اندرونی خطرات کا مقابلے کرنے کی صلاحیت تو حاصل کر لی ہی لیکن کسی بیرونی جارحیت کا مقابلہ ان کے بس کی بات نہیں ہے۔ عراقی فوج کے سربراہ بابک زبیری نے بھی تسلیم کیا ہے کہ عراق شاید اپنی سرحدوں کی حفاظت نہ کر سکے۔ سیاسی تجزیہ کار سمیع النصف کا اس حوالے سے کہنا تھا کہ امریکی فوجوں کے انخلاء کا وقت مناسب نہیں ہے اور اس اقدام سے خطے کو درپیش سیاسی اور فرقہ ورانہ چیلنجز مزید شدت اختیار کر جائیں گے۔

رپورٹ: شاہد افراز خان

ادارت: امجد علی