جرمنی: پناہ کی درخواست پر فیصلہ دس ماہ سے زائد عرصے میں

ابتدا میں موصول ہونے والی پناہ کی درخواستوں پر جرمن وفاقی ادارہ برائے مہاجرین کا عمل درآمد دس اعشاریہ آٹھ ماہ سے زائد عرصے میں مکمل ہوا جبکہ اس کے بعد آنے والی درخواستوں پر یہ وقت اوسطاﹰ دس ماہ ریکارڈ کیا گیا۔

جرمن وفاقی پارلیمان کے مطابق البانیہ کے تارکین وطن کی درخواستوں پر عمل درآمد سب سے تیز یعنی پانچ ماہ کی مدت میں ہوا۔ شامی مہاجرین کی درخواستیں اس تناظر میں دوسرے نمبر پر رہیں جن پر فیصلہ سات مہینوں میں سنایا گیا جبکہ عراقی تارکین وطن کی درخواستوں پر نو اعشاریہ ایک ماہ کے عرصے میں عمل در آمد مکمل ہوا۔

سن دو ہزار سولہ میں پناہ کی درخواستوں پر فیصلے اوسطاﹰ سات اعشاریہ ایک ماہ میں سنائے گئے تھے۔ یہ شرح سن 2015 کے مقابلے میں دو ماہ زیادہ رہی۔

مہاجرت کے اُمور کے نگران جرمن وفاقی ادارے نے سن 2017 میں سال دو ہزار سولہ اور اسے سے پہلے کے سالوں کے چار لاکھ چونتیس ہزار مقدمات پر کارروائی کی۔ سن دو ہزار سترہ میں پناہ کے چھ لاکھ تین ہزار چار سو اٹھائیس مقدمات کے فیصلے سنائے گئے، جن میں سے زیادہ تر سن دو ہزار سولہ اور اس سے پہلے کے سالوں میں دائر کیسوں کی تھی۔

جرمن حکومت نے دی لنکے کے استفسار کے جواب میں کہا ہے کہ نمٹنانے والے پرانے مقدمات جتنے زیادہ ہوتے ہیں عددی اعتبار سے ان پر عمل درآمد کا اتنا ہی زیادہ وقت درکار ہوتا ہے۔

اس ڈیٹا پر مستقبل میں مہاجرین کے لیے خصوصی مراکز بنائے جانے پر ہونے والی بحث میں بھی بات کی جائے گی۔ جرمنی کی وفاقی مخلوط حکومت کو امید ہے کہ خصوصی مراکز کے قیام سے سیاسی پناہ کی تقریباً پندرہ سو درخواستوں اور ملک بدری کے فیصلوں پر تیزی سے عمل درآمد ممکن ہو سکے گا۔ اس طرح اگر کسی کی درخواست رد کر دی گئی تو اسے اسی مرکز سے فوری طور پر واپس بھیج دیا جائے گا۔

جرمن وزیر داخلہ ہورسٹ زیہوفر پہلے ہی کہ چکے ہیں کہ اسی ماہ یا پھر جون کے شروع میں پناہ گزینوں کی ملک بدری کے عمل کو تیز تر بنانے کے ایک جامع منصوبے کا اعلان کر دیا جائے گا۔

صائمہ حیدر/ ای پی ڈی