جرمنی: انٹرنیٹ پر نفرت انگیزی پھیلانے والے اقلیت میں

جرمن نشریاتی ادارے این ڈی آر کی طرف سے ملک بھر میں سوشل میڈیا پر ہونے والے سینکڑوں مباحثوں کے حالیہ تجزیے کے بعد ہیمبرگ میں اس مطالعے کے نتائج پیش کرتے ہوئے بتایا گیا کہ فیس بک پر نفرت انگیز مواد کو کلک یا ’لائک‘ کرنے والے افراد اکثر ایسے صارفین ہوتے ہیں، جن کی تعداد مجموعی فیس بک اکاؤنٹس کا تقریباﹰ پانچ فیصد بنتی ہے۔

کمپیوٹر کی ایک ماہر جولیا ایبنر کے مطابق، ’’دائیں بازو سے تعلق رکھنے والے گروہ دانستہ طور پر فیس بک کے ایلگورتھم پر اثر انداز ہونے کی کوشش کرتے ہیں۔ یہ لوگ اس مقصد کی خاطر ایک ہی وقت اور ایک کی طرح کے ہیش ٹیگس کا انتخاب کرتے ہیں تاکہ ان کی مرضی کا ٹرینڈ انٹرنیٹ پر گردش کرے۔‘‘

یہ جائزہ لندن کے ( آئی ایس ڈی) نامی ادارے کے ساتھ مل کر تیار کیا گیا ہے۔ اس دوران کمپیوٹر کے ماہر فلپ کرائسلر نے فیس بک پر تین ہزار سے زائد پوسٹس اور تقریباً اٹھارہ ہزار کمنٹس کا جائزہ لیا۔ یہ تمام مواد جرمن اخبارات بلڈ اور کرونن کے علاوہ جریدے فوکس آن لائن، ڈیئر اشپیگل آن لائن، ٹاگس شاؤ ڈاٹ ڈی ای اور ڈی ویلٹ کے علاوہ نشریاتی ادارے زیڈ ڈی ایف کے فیس بک صفحوں سے اکھٹا کیا گیا۔

سوشل میڈیا پر نفرت انگیز مواد، جرمنی میں نئے سخت قانون پر غور

’نفرت انگیز‘ بیان دینے پر جرمن رکن پارلیمان کے خلاف مقدمہ

آن لائن نفرت انگیزی پر بھاری جرمانہ عائد کیا جائے گا، جرمن وزیر

اسی تناظر میں ماہرین کا کہنا ہے کہ انٹرنیٹ پر اگر آپ چاہیں تو بات کا بتنگڑ یا رائی کا پہاڑ بھی بنا سکتے ہیں۔ ماہرین یہ بھی کہتے ہیں کہ انٹرنیٹ پر کسی چوہے کا ہاتھی بنا دیا جانا بھی معمول کی بات ہے۔ اس عمل کے انتہائی نقصان دہ نتائج اس وقت سامنے آتے ہیں، جب کوئی ایسی سیاسی بحث شروع ہو جائے جس کو استعمال کرتے ہوئے جمہوریت کے مخالفین چھوٹی سی اقلیت ہونے کے باوجود جمہوریت کی حامی اکثریت پر اپنی رائے مسلط کرنے کی کوشش کریں۔