جرمن شہر بون میں یونیسکو کی کانفرنس کا آغاز

خبر رساں ادارے ڈی پی اے نے بتایا ہے کہ پیر کو باقاعدہ طور پر شروع ہونے والی اس دس روزہ کانفرنس کے دوران یونیسکو کی اہم تاریخی مقامات کو عالمی ورثہ قرار دینے والے کمیٹی جائزہ لے گی کہ کون سے ایسے تاریخی و قدیمی مقامات ہیں، جن کو عالمی ورثہ قرار دیا جا سکتا ہے اور پہلے سے ہی اس فہرست میں موجود کن مقامات کو اس لسٹ سے خارج کر دیا جانا چاہیے۔ اس کانفرنس میں مندوبین شامی شہر پالمیرا پر قابض انتہا پسند گروپ اسلامک اسٹیٹ کی طرف سے قدیمی مقامات کی ممکنہ تباہی پر بھی تبادلہ خیال کریں گے۔

سن 1995 کے بعد جرمنی کو پہلی مرتبہ اس کمیٹی کی کانفرنس کی میزبانی کا شرف حاصل ہو رہا ہے۔ یاد رہے کہ یہ دوسرا موقع ہے کہ دنیا بھر کے مندوبین اس اہم کانفرنس کے لیے جرمنی کا رخ کر رہے ہیں۔ فی الوقت جرمنی کے انتالیس تاریخی مقامات کو عالمی ورثے کا درجہ حاصل ہے، جن میں دارالحکومت برلن میں جزیرہ میوزیم، کولون اور آخن شہر میں قائم کیتھیڈرلز اور مختلف صوبوں میں واقع پانچ ساحلی جنگلات بھی شامل ہیں۔

جرمنی توقع کر رہا ہے کہ اس کانفرنس کے دوران اس کا ایک اور تاریخی مقام اس عالمی ورثے کی فہرست میں شامل کر لیا جائے گا۔ یوں ان جرمن مقامات کی مجموعی تعداد چالیس ہو جائے گی۔

بتایا گیا ہے کہ اس کانفرنس کے دوران جن مقامات کو عالمی ورثے کی فہرست میں شامل کیے جانے پر غور کیا جائے گا، ان میں ایران کا شہر سوسن، ترکی کا قدیمی شہر افسس اور جاپان میں ’سائٹس آف انڈسٹریل ریوولیشن‘ بھی شامل ہیں۔ اس کے علاوہ جرمن شہر ناؤمبرگ کے کیتھیڈرل کو بھی عالمی ورثے کی فہرست میں شامل کیے جانے پر تبادلہ خیال کیا جائے گا۔

جرمنی سے تعلق رکھنے والی یونسیکو ورلڈ ہیرٹیج کی چیئر ویمن ماریا بؤہمر نے ڈی ڈبلیو سے گفتگو کرتے ہوئے امید ظاہر کی ہے کہ جرمنی کا ایک اور مقام عالمی ورثے کی فہرست میں شامل کر لیا جائے گا۔ تاہم انہوں نے زیادہ تحفظات شام میں پالمیرا میں واقع تاریخی مقامات کی ممکنہ تباہی بھی ظاہر کیے۔ ان کا کہنا تھا کہ اس کانفرنس کے دوران عالمی مندوبین تفصیلی بحث کریں گے کہ اسلامک اسٹیٹ کے جنگجوؤں سے اس تاریخی ورثے کو بچانے کے لیے کیا کیا اقدامات لیے جا سکتے ہیں۔

بؤہمر کے مطابق، ’’ہمیں پالمیرا کے بارے میں سخت تشویش لاحق ہے۔ صرف یہی نہیں کہ عالمی ورثے کی فہرست میں شامل کسی پہلے مقام کو اسلامک اسٹیٹ سے خطرہ ہے بلکہ ہمیں اس قسم کے خطرات کو سنجیدگی سے لینے کی ضرورت ہے۔ میرے خیال میں یہ انتہائی ضروری ہے کہ ہم سب مل کر اس تاریخی شہر کو محفوظ بنانے کے لیے ایک متفقہ مؤقف اختیار کریں۔‘‘ انہوں نے اصرار کیا کہ اسلامک اسٹیٹ کی طرف سے اس مقام کو تباہ کر دینے کے لیے جو مذہبی دلیل اختیار کی جا رہی ہے، وہ کسی ملک کے لیے بھی قابل قبول نہیں ہو سکتی ہے، ’’یہ عمل دہشت گردی اور جنگی جرائم کے زمرے میں آتا ہے۔‘‘