تیونسی مہاجر کی ملک بدری کا حکم، میرکل کا اظہار اطمینان

میرکل کا آج بروز پیر فرینکفرٹ میں اپنی سیاسی جماعت سی ڈی یو کے سیاستدانوں کے ایک اعلیٰ سطحی اجلاس میں کہنا تھا کہ اس عدالتی حکم نامے نے ہمیں ایک واضح تصویر دیتے ہوئے حقوق کے نفاذ پر عمل درآمد ممکن بنایا ہے۔

جرمن وفاقی عدالت نے گزشتہ روز دہشت گردی کی منصوبہ بندی کرنے والے تیونس کے ایک مشتبہ تارک وطن کی ملک بدری کا حکم جاری کیا تھا۔ عدالت نے ملزم کے وکیل کی اس دلیل کو بھی مسترد کر دیا جس کے مطابق اس کے مؤکل کے وطن واپس جانے پر اسے سزائے موت دی ہو سکتی ہے۔

اطلاعات ہیں کہ اس تیونسی باشندے کے وکیل نے اُس کے جرمنی میں مزید ایک ہفتہ قیام کی درخواست انسانی حقوق کی یورپین عدالت میں آج دائر کی تھی جسے عدالت کے ترجمان کے مطابق مسترد کر دیا گیا ہے۔

مقدمے کے تفتیش کاروں کا دعوی ہے کہ ہیکل ایس نامی تیونس کے اس باشندے نے جہادی گروپ داعش کے نام پر جرمنی کی سرزمین پر دہشت گردانہ کارروائی کا منصوبہ بنایا تھا۔

ہیکل ایس کو فروری سن 2017 میں گرفتار کیا گیا تھا اور اب تک اس کی ملک بدری تعطل کا شکار رہی ہے۔ ہیکل ایس پر تیونس میں بھی دہشت گردانہ کارروائیوں میں ملوث رہنے کا شبہ ہے۔ ان کارروائیوں میں سے ایک سن 2015 میں اس افریقی ملک کے باردو میوزیم پر حملہ بھی تھا، جس میں اکیس افراد ہلاک ہوئے تھے۔

ابھی یہ واضح نہیں کہ اس تیونسی تارک وطن کو کس تاریخ کو ڈی پورٹ کیا جائے گا۔

ص ح/ ڈی پی اے