تکریت کے ایک بڑے حصہ پر دوبارہ عراق فوج کا قبضہ

عراقی فوجی اہلکاروں کے مطابق اس کارروائی کا مقصد 10 روز قبل شمالی شہر تکریت میں اسلامک اسٹیٹ کے جہادیوں کو پسپا کرنے اور اس شہر کو دوبارہ بغداد حکومت کے قبضے میں لینے کی غرض سے شروع کیے جانے والی بڑے آپریشن میں تیزی لانا ہے۔

اُدھر عراقی فوجیوں اور شیعہ ملیشیا کے اہلکاروں نے القادسيہ ضلع میں واقع ایک ہسپتال پر عراقی پرچم بلند کر دیا ہے اور اس ضلع کا دو تہائی حصہ اب عراقی فوجوں کے قبضے میں ہے تاہم اطلاعات کے مطابق عراقی فوج شہر کے جنوب اور مغربی حصوں میں زیادہ پیش قدمی نہیں کر سکی ہے۔

سابق صدر صدام حسین کے آبائی شہر کا کنٹرول حاصل کرنے کے لیے کی جانے والی فوجی کارروائی کو عراقی حکومت کی طرف سے اب تک کی سب سے بڑی فوجی کارروائی قرار دیا جا رہا ہے۔

دریں اثناء عراق اور شام میں سرگرم شدت پسند تنظیم اسلامک اسٹیٹ نے عراق کے مغربی شہر رمادی میں حکومتی کنٹرول والے علاقوں میں سلسلہ وار خودکش کار بم حملے کیے۔ پولیس کے مطابق اس دوران قریب ایک ہی وقت میں سات کار بم دھماکے کیے گئے۔ خبر رساں ادارے اے ایف پی نے ابتدائی رپورٹس اور طبی حکام کے حوالے سے بتایا ہے کہ ان حملوں میں کم از کم 10 افراد ہلاک جبکہ 30 دیگر زخمی ہوئے ہیں۔

عراقی فوج کے ایک میجر جنرل نے اپنا نام نہ ظاہر کرنے کی شرط پر اے ایف پی کو بیان دیتے ہوئے کہا،" حکومتی فورسز تکریت کے علاقے القادسيہ کو اسلامک اسٹیٹ کے جنگجوؤں سے پاک کرنے کے لیے جنگ لڑ رہی ہیں" ۔

میجر جنرل کا کہنا تھا،" ہم نے تکریت کے ملٹری ہسپتال کا کنٹرول حاصل کر لیا ہے، جو شہر کے مرکز کے نزدیک واقع ہے اور یہ سابق آمر حکمران صدام حسین کا آبائی شہر رہ چُکا ہے" ۔

عراقی فوج کے اس آپریشن کی نوعیت پر روشنی ڈالتے ہوئے اس اعلیٰ فوجی اہلکار کا مزید کہنا تھا، " ہم ایک نہایت نازک لڑائی میں مصروف ہیں کیونکہ ہم جنگجوؤں کا مقابلہ گراؤنڈ پر نہیں کر رہے ہیں، ہم ایک ایسے علاقے میں یہ کارروائی کر رہے ہیں جو بارودی سرنگوں سے بھرا ہوا ہے اور چاروں طرف سے حملہ آور ہم پر گھات لگا کر حملے کر رہے ہیں، ہماری نقل و حرکت سست رفتار ہے" ۔

اس فوجی ذریع سے پتہ چلا ہے کہ عراقی فورسز جو ُبدھ کی صُبح القادسيہ میں داخل ہوئی ہیں، ان میں فوج اور پولیس اہلکاروں کے علاوہ ’موبیلائزیشن یونٹ‘ نامی رضا کاروں پر مشتمل ایک مقبول فورس بھی شامل ہے۔

دریں اثناء متعدد دیگر فوجی اور سیاسی ذرائع نے اس امر کی تصدیق کر دی ہے کہ القادسیہ کا ایک بڑا حصہ جو شمال کی طرف تکریت کے مرکزی شہر سے ملتا ہے، کا قبضہ عراقی فورسز نے دوبارہ حاصل کر لیا ہے۔