تيونس: نئی حکومت کی اہم وزارتوں پر سابق وزراء برقرار

غنوشی نے آج کہا کہ جن وزيروں نے بن علی کے دور ميں کام کيا تھا اور وہ اب بھی اپنے عہدوں پر قائم ہيں، انہوں نے ہميشہ قومی مفاد کا تحفظ کيا ہے۔ انہوں نے اپنی نئی حکومت کے وزراء کا اعلان کرديا ہے۔ وہ سابق صدر بن علی کی حکومت کے خاتمے کے بعداگلے چھ ماہ ميں صدارتی اور پارليمانی انتخابات کی تياری بھی کرنا چاہتے ہيں۔

بن علی کے خلاف مظاہروں ميں درجنوں افراد ہلاک ہوگئے تھے۔غنوشی نے کہا: ’’ اس قتل عام کے ذمہ دار تمام افراد کو جواب دینا ہو گا۔‘‘ انہوں نے يہ بھی کہا کہ انہوں نے کبھی بھی سکيورٹی کے عملے کو گولی چلانے کا حکم نہيں ديا۔

تيونس کی نئی حکومت ميں سابق صدر بن علی کی ڈيموکريٹک پارٹی کو خارجہ اور داخلی امور، ماليات اور دفاع جيسی تمام اہم وزارتيں حاصل ہيں حالانکہ گزشتہ روز تيونس اور دوسرے شہروں ميں ہزاروں مظاہرين نے ان کی پارٹی کو کالعدم قرار دينے کا مطالبہ کيا۔

ليکن غنوشی نے کہا کہ سابق وزراء کو اس لئے بحال رکھا گيا ہے کيونکہ اس وقت اُن کی ضرورت ہے اور ان سب نے اپنے ہاتھ صاف رکھے ہيں۔ غنوشی کے مطابق ان وزراء نے ملکی محبت کی وجہ سے زيادہ نقصان نہيں ہونے ديا اور اُنہوں نے قومی مفاد کی خاطرہنگاموں کے دوران زيادہ مہلت حاصل کرنے کی کوشش کی۔ بن علی نے تيونس پر 23 سال تک نہايت سختی کے ساتھ حکومت کی۔ نئی حکومت ميں قانونی اپوزيشن کے بعض رہنما اور سول سوسائٹی کے نمائندے شامل ہيں ليکن اس ميں ممنوعہ سياسی جماعتيں، مثلاً کميونسٹ اور اسلامی بيداریء نو پارٹی شامل نہيں ہے۔ غنوشی نے فرانسیسی ريڈيو يورپ ون کو انٹرويو ديتے ہوئے يہ بھی کہا کہ وہ اس سے اتفاق کرتے ہيں کہ سابق صدر بن علی کے حکومت کے آخری دور ميں امور حکومت درحقيقت اُن کے نہيں، بلکہ اُن کی اہليہ ليلیٰ کے ہاتھ ميں تھے۔

رپورٹ: شہاب احمد صدیقی

ادارت: امتیاز احمد