بھارت ميں دو لڑکيوں کے ساتھ اجتماعی زيادتی اور ان کا قتل

بھارتی رياست ہريانہ کی پوليس مردوں کے ايک گروپ کے تعاقب ميں ہے، جن پر شبہ ہے کہ انہوں نے کورکھشیتر ضلعے ميں ايک پندرہ سالہ لڑکی کو اجتماعی زيادتی کا نشانہ بنانے کے بعد اسے قتل کر ديا۔ پوليس کو اس لڑکی کی لاش جمعے کے روز ايک ندی سے ملی۔ ضلعی پوليس چيف ابھيشيک گارگ نے بتايا کہ لڑکی کو گہری اندونی چوٹيں آئی تھيں جس سبب ايسا معلوم ہوتا ہے کہ حملہ آوروں نے کسی نوکيلی چيز کا استعمال کيا تھا۔ گارگ نے مزيد بتايا، ’’ہميں شک کے کہ اس کارروائی ميں کم از کم چار افراد ملوث تھے۔‘‘ ضلعی پوليس چيف کے بقول مشتبہ افراد کی تلاش کا عمل جاری ہے۔

دريں اثناء جمعے کو اس پندرہ سالہ لڑکی کی لاش ملنے کے کچھ ہی گھنٹوں بعد اسی ہريانہ رياست کے ايک اور ضلعے پانی پت ميں پانی کے ايک تالاب سے ايک بارہ سالہ بچی کی لاش برآمد ہوئی۔ پانی پت کی پوليس کے سربراہ راہول شرما نے بتايا کہ بچی کے دو محلے داروں کو حراست ميں لے ليا گيا ہے، جنہوں نے اس کے ساتھ جنسی زيادتی اور پھر اسے قتل کرنے کا اعتراف کيا۔

تجزیہ کاروں کے مطابق يہ واقعات اس بات کی عکاسی کرتے ہيں کہ حکام کی تنبيہ اور ملک گير احتجاج کے باوجود بھارت ميں جنسی جرائم اب بھی جاری ہيں۔ سرکاری اعداد و شمار کے مطابق سن 2016 ميں چھتيس ہزار نابالغ لڑکيوں کو جنسی طور پر ہراساں کيا گيا۔ بچوں کے حقوق کے حوالے سے اقوام متحدہ کی سن 2014 ميں جاری کردہ ايک رپورٹ کے مطابق بھارت ميں جنسی زيادتی کے ہر تين ميں سے ايک واقعے ميں کسی نابالغ بچی کو نشانہ بنايا جاتا ہے۔ اقوام متحدہ نے اس پر گہری تشويش کا اظہار کيا تھا۔

يہ امر اہم ہے کہ دارالحکومت نئی دہلی ميں دسمبر سن 2012 ميں ميڈيکل کی ايک طالبہ کے ساتھ ايک چلتی ہوئی بس پر اجتماعی جنسی زيادتی اور اس کے بے رحمانہ قتل کے بعد ملکی سطح پر احتجاج اور قوانين ميں تبديلی ديکھنے ميں آئی تھی۔