بوسنیا: غیر قانونی مہاجرت کا سدّ باب کیا جائے گا

مہاجرین کے حوالے سے خبریں فراہم کرنے والے یورپی ادارے انفو مائیگرنٹس کے مطابق بوسنیا کے وزیر اعظم ڈینی زوزڈک نے ایک بیان میں کہا ہے کہ اُن کی حکومت ملک کے ہر اُس حصے سے داخل ہونے والے تارکین وطن کو روکے گی جو سرکاری طور پر بارڈر کراسنگ نہیں ہے۔

گزشتہ ہفتے وزیر اعظم زوِزڈک نے بتایا تھا کہ اُن کی حکومت نے مہاجرت کے عمل کو روکنے کے لیے کئی اقدامات اٹھائے ہیں۔ ان میں سے ایک بارڈر پولیس کے نظام کو مزید مستحکم کرنا بھی ہے اور اس فورس میں دیگر سکیورٹی اداروں کے افراد کو بھی شامل کیا گیا ہے۔

بوسنیا کے وزیر اعظم کا کہنا تھا کہ اس ضمن میں سربیا اور مونٹی نیگرو کو بھی تحریری طور پر آگاہ کیا جائے گا کیونکہ انہی ممالک سے زیادہ تر پناہ گزین خفیہ راستوں سے بوسنیا میں داخل ہوتے ہیں۔

بوسنیا میں سلامتی کے امور کے وزیر دَرہگان میکٹِک نے بھی حال ہی میں کہا تھا کہ حکام کا سب سے بنیادی مقصد ملکی سرحدوں کو محفوظ بنانا ہے۔

حفظان صحت کے نقطہ نظر سے ابتر حالات کے شکار قریب چھ سو مہاجرین کو مونسٹار کے علاقے سے قریب تیس کلو میٹر شمال میں سلاکوویک کے استقبالیہ مرکز میں منتقل کیا جا رہا ہے۔

ملکی وزارت صحت کا کہنا ہے کہ رواں برس کے ابتدائی چار ماہ میں چار ہزار پانچ سو تارکین وطن ملک میں داخل ہوئے تھے جس میں سے سّتر فیصد پہلے ہی جا چکے ہیں۔

دوسری جانب کونسل آف ہیومن رائٹس کمیشن کی جانب سے بوسنیا اور ہرزیگووینا میں سکیورٹی اور انسانی حقوق کے وزرأ کو ایک خط ارسال کیا گیا ہے جس میں کہا گیا ہے مہاجرین کی آمد پر انتظامی امور کو بہتر بنانے کی ہر ممکن کوشش کی جائے۔

ص ح/ انفو مائیگرنٹس