ایرانی علماء کی مجلس شوریٰ پر برہمی

بیان میں کہا گیا ہے کہ مجلس شوریٰ کو انتخابی تنازعے میں منصف بننے کا کوئی حق نہیں رہا اور اس کے بعض ارکان عوام کی نگاہ میں قائم اپنا غیرجانبدرانہ تشخص کھو بیٹھے ہیں۔

گزشتہ منگل کو 12 رکنی مجلس شوریٰ نے ایرانی صدر محمود احمدی نژاد کئے دوبارہ انتخاب کی توثیق کر دی تھی۔ احمدی نژاد 12 جون کے صدارتی انتخابات کے نیتجے میں واضح اکثریت سے جیت گئے تھے۔ تاہم ان کے حریف امیدواروں نے انتخابی نتائج میں بے ضابطگیوں کا الزام عائد کیا تھا جس کے بعد پرتشدد مظاہرے چھڑ گئے تھے۔ ان احتجاجی مظاہروں کے دوران کم از کم 20 افراد ہلاک ہوئے۔

مجلس شوریٰ کے خلاف بیان جاری کرنے والے علماء کو ا صلاح پسند خیال کیا جاتا تھا۔ انہوں نے اپنے بیان میں کہا ہے کہ مجلس شوریٰ نے انتخابی نتائج میں بے ضابطگیوں کے بارے میں ہارنے والے امیدواروں میرحسین موسوی اور مہدی کروبی کی شکایات کو نظرانداز کیا۔

بیان میں کہا گیا ہے کہ انتخابی نتائج پر عوام کے احتجاج کو بھی تشدد سے دبایا گیا جس سے متعدد افراد ہلاک اور زخمی ہوئے جبکہ اس دوران بیشتر کو گرفتار کیا گیا۔

ان اصلاح پسند علماء نے مظاہروں کے دوران گرفتار افراد کی رہائی کا مطالبہ بھی کیا ہے۔ اُدھر ایرانی پولیس کے سربراہ کا کہنا ہے کہ احتجاجی مظاہروں کےدوران ایک ہزار 32 افراد کو گرفتار کیا گیا تھا جن میں سے ایک تہائی کو رہا کیا جا چکا ہے۔

دوسری جانب سابق ایرانی صدر اکبر ہاشمی رفسنجانی نے کہا ہے کہ ملک میں اقتدار کی جنگ نہیں چل رہی۔ احتجاجی مظاہروں کے دوران گرفتار بعض افراد کے خاندانوں کے ساتھ اتوار کو ملاقات کے دوران ان کا کہنا تھا کہ انتخابی نتائج کے بعد پیدا ہونے والی صورت حال سے تلخیاں پیدا ہوئی ہیں اور اس صورت حال سے کوئی باشعور شہری مطمئن نہیں۔ 75 سالہ رفسنجانی میر حسین موسوی کے حامی ہیں۔

اُدھر ایران نے واشنگٹن ٹائمز کے یونانی صحافی کی رہائی کا اعلان کیا ہے جبکہ برطانوی وزیرخارجہ ڈیوڈ ملی بینڈ نے کہا کہ ایران اتوار کو برطانوی سفارت خانے کے ایک اور اہلکار کو رہا کر دے گا۔ تہران میں گزشتہ دنوں برطانوی سفارت خانے کے نو اہلکاروں کو انتخابی نتائج کے بعد بدامنی پھیلانے کے الزام میں گرفتار کیا گیا تھا۔