اٹلی ميں نئی حکومت کی تشکیل

انتاليس سالہ ماتیو رینزی نے اپنی سولہ رکنی کابينہ کے ہمراہ ہفتہ بائيس فروری کے روز دارالحکومت روم کے صدارتی محل ميں منعقدہ ايک تقريب ميں حلف اٹھايا۔ يوں رينزی وزير اعظم کا منصب سنبھالنے والے اٹلی کی تاريخ کے کم عمر ترين شخص بن گئے ہيں۔ ان کی کابينہ ميں شامل وزراء ميں نصف تعداد خواتين وزراء کی ہے جبکہ کابينہ کی اوسط عمر اڑتاليس برس سے بھی کم ہے۔ يہ اٹلی کی تاريخ کی کم عمر ترين حکومت ہے۔

ملکی صدر جورجيو ناپوليتانو سے حلف اٹھانے کے بعد ماتيو رينزی نے مائکرو بلاگنگ ويب سائٹ پر جاری کردہ اپنے ايک پيغام ميں لکھا، ’’يہ ايک مشکل کام ہے ليکن ہم اٹلی ہيں، ہم کامياب ہو جائيں گے۔ اپنے آپ سے سچا، آزاد اور سادہ رہنے کا وعدہ۔‘‘حلف برداری کی تقريب کے بعد رينزی نے کابينہ کا اجلاس طلب کيا، جس کے بعد توقع ہے کہ نو منتخب وزير اعظم پير کے روز ملکی پارليمان کے ايوان بالا ميں اپنے پروگرام کا اعلان کريں گے جبکہ منگل کو وہ ايوان زيريں سے خطاب کرنے والے ہيں۔

ماتیو رینزی کا تعلق بھی اسی ڈیموکریٹک پارٹی سے ہے، جس سے سابق وزیر اعظم اینریکو لیٹا تعلق رکھتے ہیں۔ لیکن لیٹا کے برعکس رینزی اس پارٹی کے سربراہ ہیں۔ ان کی تقرری اس ليے عمل ميں آئی کيونکہ ملک کو درپيش چيلنجز کے تناظر ميں سياسی اصلاحات کرنے سے قاصر رہنے کے سبب سابق وزير اعظم اينريکو ليٹا نے پارٹی کے مطالبے پر حال ہی ميں استعفی دے ديا تھا۔

اٹلی سے تعلق رکھنے والے سياسی مبصر ماريو کالابريسی نے نئی حکومت کے قدرے کم عمر ہونے کے بارے ميں بات کرتے ہوئے کہا ہے کہ رينزی نئی توانائی سے بھرپور قيادت کے ساتھ ’سٹہ‘ کھيل رہے ہيں تاہم اس حوالے سے شکوک و شبہات اٹھنے چاہييں کہ آيا حکومت کا تجربہ اس قابل ہے کہ وہ ملک کو جنگ کے بعد کے اپنے بد ترين اقتصادی بحران سے نکال سکے۔

اٹلی ان دنوں اقتصادی بد حالی کو بدلنے کی کوششوں ميں ہے جبکہ سرکاری قرضوں کی سطح بھی مجموعی قومی پيداوار کے 130 فيصد تک پہنچ چکی ہے۔ ملک ميں بے روزگاری کی مجموعی سطح ريکارڈ 12.7 فيصد پر ہے جبکہ نوجوانوں ميں يہ شرح 41.6 فيصد تک پہنچ چکی ہے۔