اقتدار نئی حکومت کو منتقل کر دیا جائے گا: صدر تھین سین

میانمار کے صدر تھین سین نے آج اتوار کے روز کہا ہے کہ عام انتخابات میں آنگ سان سوچی کی سیاسی جماعت کی کامیابی اُن کی حکومت کے اصلاحاتی عمل کا نتیجہ ہے اور منتقلیٴ اقتدار کا عمل بھی مکمل کیا جائے گا۔ ان خیالات کا اظہار انہوں نے ینگون میں الیکشن میں حصہ لینے والی سیاسی پارٹیوں کے رہنماؤں کی میٹنگ میں کیا۔ وہ الیکشن کے بعد پہلی مرتبہ کسی پبلک میٹنگ میں شریک تھے۔ انہوں نے مزید کہا کہ آٹھ نومبر کے الیکشن اُن کی حکومت کی سیاسی و اقتصادی تبدیلیوں کا نتیجہ ہیں۔

میانمار کے صدر جس میٹنگ میں شریک تھے، اُس میں ملک کی ستر سے زائد پارٹیوں کے لیڈران شریک تھے۔ اِس اجلاس میں اگلے برس اقتدار کی منتقلی سے قبل کی صورتِ حال پر فوکس کیا گیا۔ صدر تھین سین کے مطابق اگلے برس نئی پارلیمنٹ کی تشکیل کے بعد نئی حکومت سازی کا عمل شروع ہوتے ہی اقتدار منتقل کر دیا جائے گا۔ تھین سین نے یہ بھی کہا کہ جو سیاسی و اقتصادی تبدیلی کا عمل شروع کیا گیا ہے، وہ اگلی حکومت کے حوالے بھی کیا جائے گا تا کہ وہ بھی اِس عمل کو جاری رکھے۔

#

رواں مہینے میں ہونے والے انتخابات میں موجودہ صدر تھین سین کی جماعت یونین سولیڈیریٹی اینڈ ڈیویلپمنٹ پارٹی کو انتہائی بڑی شکست کا سامنا رہا تھا۔ دوسری جانب نوبل انعام یافتہ خاتون سیاستدان آنگ سان سوچی کی سیاسی پارٹی نیشنل لیگ فار ڈیموکریسی کو بھاری کامیابی ملی تھی۔ نیشنل لیگ فار ڈیموکریسی کو اسی فیصد نشستیں حاصل ہوئی ہیں۔ یہ امر اہم ہے کہ تھین سین کی سیاسی جماعت کو فوج کی حمایت بھی حاصل ہے۔ میانمار کی نئی پارلیمنٹ کا اجلاس اگلے برس فروری میں ہو گا۔

نئی پارلیمنٹ میں موجودہ حکمران سیاسی جماعت یونین سولیڈیریٹی اینڈ ڈیویلپمنٹ پارٹی اپوزیشن میں بیٹھے گی۔ صدر اور فوج نے جیتنے والی سیاسی جماعت کی لیڈر آنگ سان سوچی کے ساتھ حکومت سازی کے حوالے سے بات چیت شروع کرنے پر اتفاق کیا ہے۔ مبصرین کا خیال ہے کہ خاتون اپوزیشن لیڈر کے لیے ضروری ہے کہ وہ فوج کے ساتھ دوستانہ تعلقات کو فروغ دے کیونکہ ملکی سیاسی و اقتصادی معاملات میں فوج کا کردار خاصا اہم ہے۔ صدر تھین سین ملکی فوج کے سابق سربراہ رہ چکے ہیں اور پانچ برس قبل وردی اتارنے کے بعد سے وہ سویلین حکومت کے سربراہ چلے آ رہے ہیں۔