اسلام آباد کا ریڈ زون، چار روزہ دھرنے کا نتیجہ

اس دھرنے کے دوران اسلام آباد میں موبائل فون سروس زیادہ تر معطل رہی جب کہ مشتعل مظاہرین نے سڑکوں پر لگائے گئے پودوں کو بھی نقصان پہنچایا۔ گزشتہ چار دنوں کے دوران دھرنے کی جگہ پر بار بار بدامنی کے متعدد واقعات بھی دیکھنے میں آئے۔

ممتاز قادری کو دی جانے والی پھانسی پر اس کے چہلم کے بعد اس دھرنے کے دوران پرتشدد احتجاج کرنے والے مظاہرین نے سرکاری املاک کو بھی نقصان پہنچایا۔ ماہرین کے مطابق مجموعی مالی نقصانات کی مالیت کروڑوں میں رہی۔

دھرنے کے دوران مظاہرین نے میٹرو بس سسٹم کے ایک اسٹاپ کو بھی شدید نقصان پہنچایا اور بے تحاشا توڑ پھوڑ کی۔ اس میٹرو سسٹم کا راولپنڈی اسلام آباد میں افتتاح ابھی کچھ عرصہ قبل ہی کیا گیا تھا۔ اس منصوبے پر مجموعی طور پر اربوں روپے کی مجموعی لاگت آئی تھی۔

پارلیمنٹ ہاؤس کے قریب میٹرو بس کا اسٹاپ جس کے باہر بپھرے ہوئے مظاہرین نے متعدد موٹر سائیکلوں کو آگ بھی لگا دی تھی۔

دھرنے کے دوران حالات کو قابو میں رکھنے کی کوشش کرنے والے سکیورٹی اہلکاروں نے وہاں نئے پہنچنے والے مظاہرین کو روکنے، واپس بھیجنے یا حراست میں لینے کا سلسلہ بھی جاری رکھا۔ اس تصویر میں حراست میں لیے گئے چند مظاہرین کو پولیس کی ایک گاڑی میں سوار کرایا جا رہا ہے۔

چار روزہ دھرنے کے دوران امن عامہ کی صورت حال کو قابو میں رکھنے کے لیے پولیس کی بھاری نفری تعینات کی گئی تھی، لیکن حالات قانون نافذ والے اداروں کے اہلکاروں کے کنٹرول میں تمام وقت نہ رہے۔

حکام نے اس دھرنے کے دوران احتیاطی طور پر کئی اہم قریبی عمارتوں کو خالی بھی کرا لیا تھا۔ لیکن پھر بھی جو نئے مظاہرین ڈی چوک میں دھرنا دینے والے اپنے ساتھیوں تک پہنچنے کی کوشش کرتے، انہیں حراست میں لے لیا جاتا۔

ڈی چوک میں جمع مظاہرین کے چار روزہ قیام سے اس مقام پر حفظان صحت اور صفائی کی عموعمی صورت حال بھی کافی خراب رہی۔

مظاہریں کئی بار موبائل فون سروس معطل رہنے کے باوجود آپس میں اور اپنے اقربا کے ساتھ رابطے میں رہنا چاہتے تھے۔ اس کے لیے انہوں نے بجلی کی پاور لائنز کے ذریعے اپنے موبائل فون براہ راست چارج کرنے کا راستہ بھی نکال لیا تھا۔