1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

IPL پوائنٹس ٹیبل پر ممبئی انڈینز کا راج

کرکٹ کے ٹی ٹوئنٹی فارمیٹ کی مقبول ترین لیگ ’آئی پی ایل‘ میں اس وقت سچن تندولکر کی قیادت میں ممبئی انڈینز پوائنٹس ٹیبل پر سب سے آگے ہیں۔ لیگ میں کنگس الیون پنجاب اور چنئی سُپر کنگس کی کارکردگی انتہائی مایوس کن رہی ہے۔

default

ماسٹر بلاسٹر سچن تندولکر

پوائنٹس ٹیبل پر اس وقت ممبئی انڈینز کی ٹیم دس پوائنٹس کے ساتھ پہلے نمبر پر ہے جبکہ رائل چیلنجرز بنگلور اور راجستھان رائلز کی ٹیمیں آٹھ آٹھ پوائنٹس کے ساتھ بالترتیب دوسری اور تیسری پوزیشن پر ہیں۔ کمار سنگا کارا کی قیادت میں کنگس الیون پنجاب نے اب تک اپنے چھ میچوں میں صرف ایک میں ہی کامیابی حاصل کی ہے۔ اس کے محض دو پوائنٹس ہیں۔

کنگس الیون پنجاب کی طرح چنئی سُپر کنگس بھی اس سیزن میں اچھی کارکردگی دکھانے میں ناکام ثابت ہو رہی ہے۔ مہیندر سنگھ دھونی کی کپتانی میں اس ٹیم نے سات میچوں میں اب تک صرف دو میں جیت حاصل کی ہے۔ اس کے پاس چار پوائنٹس ہیں۔

Shah Rukh Khan Kolkata Knight Riders

نائٹ رائڈرز کے کپتان سورو گنگولی، مالک شاہ رخ خان اور بولنگ کوچ وسیم اکرم ایک ساتھ

پچھلے دو سیزنز میں ’آئی پی ایل‘ کی کمزور ترین ٹیم کولکتہ نائٹ رائڈرز نے اس مرتبہ اچھی کارکردگی دکھانے کا ارادہ ظاہر کیا ہے۔ سورو گنگولی کی قیادت میں اس ٹیم نے رواں سیزن میں اب تک تین میچوں میں کامیابی حاصل کی ہے جبکہ تین میں اسے شکست ہوئی۔ اس کے چھ پوائنٹس ہیں۔ اس ایڈیشن میں پاکستان کے مایہ ناز سابق ٹیسٹ کپتان اور سوئنگ بولنگ کے ’سلطان‘ وسیم اکرم نائٹ رائڈرز ٹیم کے بولنگ کوچ ہیں۔

IPL میں اب تک کُل پچیس میچ کھیلے جا چکے ہیں۔ آج پیر کے روز دہلی کے فیروز شاہ کوٹلہ میدان پر دہلی ڈیئر ڈیویلز اور کولکتہ نائٹ رائڈرز کے درمیان ایک اہم میچ کھیلا جا رہا ہے۔

پہلے دو ایڈیشنز کی طرح انڈین پریمیئر لیگ کے اس تیسرے ایڈیشن میں بھی آٹھ ہی ٹیمیں حصہ لے رہی ہیں۔ چنئی سُپر کنگس، دکن چارجرز، دہلی ڈیئر ڈیویلز، کنگس الیون پنجاب، کولکتہ نائٹ رائڈرز، ممبئی انڈینز، راجستھان رائلز اور رائل چیلنجرز بنگلور کی ٹیمیں اس بار بھی چیمپیئن بننے کے لئے سر توڑ کوششیں کر رہی ہیں۔

Indian Premier League Cricket

رائل چیلنجرز بنگلور کے کپتان انیل کمبلے

تاہم انڈین پریمیئر لیگ کے چوتھے ایڈیشن میں آٹھ کے بجائے دس ٹیمیں حصہ لیں گی۔ موجودہ آٹھ ٹیموں کے علاوہ اب پونے اور کوچی کی ٹیمیں بھی انڈین پریمیئر لیگ میں شریک ہوں گی۔

’آئی پی ایل‘ کے پہلے سیزن میں چیمپیئن شپ، شین وارن کی قیادت میں راجسھتان رائلز نے جیتی تھی جبکہ دوسرے سیزن میں دکن چارجرز نے ایڈم گلکرسٹ کی کپتانی میں ٹائٹل اپنے نام کر لیا تھا۔ لیگ کا پہلا سیزن بھارت میں ہی کھیلا گیا تھا تاہم سیکیورٹی وجوہات کے باعث اس کے دوسرے ایڈیشن کا اہتمام جنوبی افریقہ میں کیا گیا تھا۔

دوسرے سیزن کی طرح اس مرتبہ بھی انڈین پریمیئر لیگ میں پاکستان کا ایک بھی کھلاڑی شریک نہیں ہے۔ ممبئی حملوں کے بعد پاکستانی حکام نے اپنے کھلاڑیوں کو سیکیورٹی وجوہات کی بناء پر ’آئی پی ایل‘ کے دوسرے ایڈیشن میں کھیلنے کی اجازت نہیں دی تھی جبکہ اس بار لیگ کی آکشن میں ایک بھی پاکستانی کھلاڑی فروخت نہیں ہوا۔

انڈین پریمیئر لیگ کے تیسرے سیزن میں کئی نئے بین الاقوامی کرکٹرز کھیل رہے ہیں، جن میں ویسٹ انڈیز کے آل راوٴنڈر کیرن پولارڈ اور انگلش بیٹسمین اوئن مارگن قابل ذکر ہیں۔

رپورٹ: گوہر نذیر گیلانی/ خبر رساں ادارے

ادارت: مقبول ملک

DW.COM

Audios and videos on the topic