1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

یورپ کا سفر کرنے میں احتیاط کریں، امریکی تنبیہ

امریکا نے اپنے شہریوں کو تنبیہ کرتے ہوئے انہیں یورپ کے سفر کے دوران احتیاط سے کام لینے کا مشورہ دیا ہے۔ یہ سفری انتباہ یورپ میں حملوں کے بڑھتے ہوئے خطرات کے پیش نظر کیا گیا ہے۔

امریکی وزارت خارجہ کے ایک اہلکار کے بقول، ’’موسم گرما کی چھٹیوں سے قبل یورپ میں دہشت گردانہ حملوں کا خطرہ زیادہ ہے۔‘‘ اس بیان میں مزید کہا گیا ہے کہ دہشت گرد بڑے بڑے شاپنگ مالز، حکومتی مراکز، ہوٹلوں، کلبوں، ریستورانوں، پارکوں، ہوائی اڈوں اور دیگر عوامی مقامات کو نشانہ بنا سکتے ہیں۔

اس تناظر میں فرانس، روس، سویڈن اور برطانیہ میں ہونے والے تازہ حملوں کا حوالہ دیا گیا ہے۔ امریکی وزارت خارجہ کے مطابق، ’’اسلامک اسٹیٹ یا القاعدہ جیسی دہشت گرد تنظیمیں یورپ میں دہشت گردانہ کارروائیوں کی منصوبہ بندی کرنے اور ان پرعمل کرنے کی صلاحیت رکھتی ہیں۔‘‘

یہ پہلی مرتبہ نہیں ہوا کہ امریکی وزارت خارجہ نے اپنے شہریوں کو یورپ کے سفر کے حوالے سے تنبیہ کی ہے۔ اس سے قبل ایسا ہی ایک سفری ہدایت نامہ گزشتہ برس سردیوں کے موسم میں بھی جاری کیا گیا تھا، جس کی مدت ابھی فروری میں ہی ختم ہوئی تھی۔

واشنگٹن میں امریکی وزارت خارجہ کے ایک اہلکار کے بقول، ’’یہ تازہ سفری تنبیہ کسی خاص اندیشے کے پیش نظر جاری نہیں کی گئی بلکہ اس کا مقصد حملوں کے اُس مسلسل خطرے کی ایک طرح سے نشاندہی کرنا ہے، جس کا آنے والی گرمیوں کی چھٹیوں میں سامنا کرنا پڑ سکتا ہے۔‘‘ یہ نیا ہدایت نامہ یکم ستمبر2017ء تک کے لیے جاری کیا گیا ہے۔

ملتے جلتے مندرجات