1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

مہاجرین کا بحران

یورپی یونین اور ترکی مہاجرین کی ڈیل کا احترام کریں، ینکر

یورپی کمیشن کے سربراہ نے کہا ہے کہ انقرہ حکومت اور یورپی یونین کو مہاجرین سے متعلق طے پانے والے معاہدے کا احترام کرنا چاہیے۔ مہاجرین کی یورپ آمد روکنے کے حوالے سے یہ ڈیل رواں برس اٹھارہ مارچ کو برسلز میں طے پائی تھی۔

یورپی کمیشن کے سربراہ ژاں کلود ینکر نے کہا ہے کہ ترکی کے ساتھ مہاجرین کے معاملے پر ڈیل کا احترام ضروری ہے اور مستقبل میں بھی یہ عمل جاری رہنا اہم ہے۔ انہوں نے یہ بات بیلجیم کے ’ لا لبرے بیلجیک‘ اخبار کو انٹرویو دیتے ہوئے کہی۔ ینکر کے مطابق یونین نے ڈیل کو طے کیا تھا اور اس کی پاسداری بھی اہم  ہے۔

اس انٹرویو میں یورپ کے سینیئر سیاستدان نے کہا کہ سن 2003 سے لے کر سن 2014 تک ایردوآن حکومت نے یورپی یونین میں شمولیت کے حوالے سے جمہوری اقدار پر عمل پیرا ہو کر خاصی مثبت پیش رفت  کی تھی۔ ینکر کے مطابق گزشتہ دو برسوں میں ترک حکومت یورپی اصولوں اور اقدار سے پیچھے ہٹنا شروع ہو گئی ہے اور یہی سارے مسئلے کی جڑ ہے۔

ینکر نے اپنے انٹرویو میں اس یقین کا اظہار کیا کہ ترک صدر رجب طیب ایردوآن اور اُن کی حکومت اِس وقت اپنی کوتاہیوں کو نظرانداز کرتے ہوئے یورپ پر قبل از وقت الزام عائد کر رہی ہے کیونکہ اُسے یونین کی رکنیت حاصل کرنے کے معاملے میں مشکلات کا سامنا ہے اور مذاکراتی عمل میں یورپی ضوابط و اقدار کے تناظر میں کئی رکاوٹیں حائل ہیں۔

Frankreich Straßburg EU Parlament Jean-Claude Juncker (picture-alliance/dpa/P. Seeger)

یورپی کمیشن کے سربراہ ژاں کلود ینکر

یورپی کمیشن کے صدر نے واضح کیا کہ رکنیت کے حصول کے لیے  مذاکراتی عمل میں جو تعطل پیدا ہوا ہے، وہ بنیادی طور پر ترکی کے انکار کی وجہ سے ہے کیونکہ وہ انسدادِ دہشت گردی کی قانون سازی میں اصلاحات کرنے پر تیار نہیں اور حقیقت یہ ہے کہ یورپی یونین کا رکن بننے کے لیے اس شرط پر عمل پیرا ہونا ایک اہم شرط ہے۔ ینکر نے ترک صدر سے کہا کہ یونین پر الزام رکھنے سے قبل وہ خود سوچیں کہ یورپی سرزمین پر ترک باشندوں  کی آزادانہ نقل و حرکت ممکن نہ ہونے میں اُن کا اپنا کردار کتنا ہے۔

 دوسری جانب دو روز قبل جرمن چانسلر انگیلا میرکل نے ترکی اور یورپی یونین پر زور دیا ہے کہ وہ رواں برس مارچ میں مہاجرین کے حوالے سے طے پانے والے معاہدے کا احترام کریں۔ جرمن چانسلر میرکل کی جانب سے جمعے کے روز دیا گیا یہ بیان ترکی اور یورپی یونین کے مابین جاری کشیدگی میں کمی کی کوشش کے طور پر دیکھا جا رہا ہے۔