1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

یورو کے استحکام کے لئے ٹھوس اقدامات: رومپوئے

یورپی یونین کے صدر ہیرمن فان رومپوئے نے برسلز میں جاری یورپی یونین سمٹ کے بعد اپنے ایک بیان میں کہا ہے کہ یورپی رہنماؤں نے جمعہ کے روز ہونے والی ملاقات میں یورو کے استحکام کے لئے اہم فیصلے کئے ہیں۔

default

رومپوئے کے مطابق گزشتہ روز یورپی رہنماؤں کی طرف سے اہم فیصلے کئے گئے تاکہ ایک ایسا نظام قائم کیا جا سکے، جو یورو زون کو مستقبل میں کسی پریشانی میں مبتلا ہونے سے بچا سکے۔

’’یورپی کونسل نے یورو زون ہنگامی نظام پر اتفاق ظاہر کیا۔ یہ ایک ایسا مربوط معاہدہ ہے جو یورو کو مستحکم کرے گا۔ گزشتہ کیا ماہ میں یورپی رہنماؤں کی طرف سے اٹھایا جانے والا یہ اہم ترین اقدام ہے۔‘‘

رومپوئے نے کہا کہ جمعہ کے روز ہونے والے یورپی سربراہ اجلاس میں آئندہ ہونے والی بین الاقوامی اجلاسوں کے حوالے سے منصوبہ بندی کی گئی تاکہ دنیا بھر میں یورپی یونین کے پارٹنرز کو ایک مضبوط پیغام دیا جا سکے۔

’’ہم نے اجلاس کے آغاز میں دو ہفتے بعد سیول میں ہونے والے جی 20 سربراہ اجلاس کے بارے میں تفصیلی بات چیت کی۔ عالمی تجارت میں عدم توازن اور اس کے دنیا پر پڑنے والے اثرات کے ساتھ ساتھ عالمی اقتصادی بحران کے خاتمے کے بعد اس کے اثرات زیربحث رہے۔ اجلاس میں یورپی یونین میں بیروزگاری میں اضافے اور اقتصادی نمو میں کمی کے رجحانات پر بھی گفتگو کی گئی۔ میں، یورپی کمیشن کے سربراہ اور دیگر یورپی سربراہان جی 20 اجلاس میں یورپی مؤقف کا مکمل دفاع کریں گے۔‘‘

NO FLASH EU Gipfel in Brüssel Pressekonferenz

جرمن چانسلر انگیلا میرکل

اجلاس کے بعد اپنے ایک بیان میں یورپی کمیشن کے سربراہ یوزے مانویل باروسو نے کہا کہ یورپی یونین کے سربراہ اجلاس میں سب سے زیادہ اہم موضوع یورپی معیشت کی مضبوطی اور استحکام رہا اور اس حوالے سے ’واقعی‘ پیش رفت ہوئی۔ انہوں نے امید ظاہر کی کہ دیگر یورپی ادارے اس پیش رفت کی جلد ہی تصدیق کر دیں گے۔

’’ہمیں کچھ فیصلے داخلی سطح پر کرنے ہیں تاہم ہمیں بین الاقوامی صورتحال کو بھی ذہن میں رکھنا چاہیے۔ طویل بنیادوں پر ہماری معیشت کا دارومدار بہرحال عالمی تبدیلیوں پر ہے۔ اس لئے مجھے خوشی ہے کہ یورپی کونسل کے صدر اور میں جب یورپی یونین کی جی 20 نمائندگی کریں گے، تو ہمیں یورپی سربراہان کی بھرپور حمایت حاصل ہو گی۔ یورپی اجلاس میں جی 20 کے حوالے سے تفصیلی ایجینڈا طے کیا گیا ہے۔‘‘

NO FLASH EU Gipfel Brüssel Belgien

برسلز سربراہ اجلاس میں یورو کا استحکام اہم ترین موضوع ہے

دوسری جانب جرمن چانسلر انگیلا میرکل کی طرف سے ایک بیان میں کہا گیا ہے کہ یورپی یونین میں شامل ممالک کی معیشتوں پر ہنگامی بنیادوں پر نگاہ رکھنے کے لئے یورپی سطح کے نظام کی موجودگی جرمن نکتہ نظر تھا۔ انہوں نے کہاکہ اس نظام کی موجودگی یورپی ممالک کی پسند یا نا پسند کی بات نہیں بلکہ ایک اہم ضرورت ہے۔

’’جرمنی کی جانب سے بار بار اس نظام کا مطالبہ کیا جاتا رہا ہے۔ اس حوالے سے ہمارا مؤقف واضح اور مدلل ہے کیونکہ یہ ایک اہم ضرورت ہے۔‘‘

فرانسیسی صدر نکولا سارکوزی کی طرف سے ایک بیان میں کہا گیا ہے کہ یورو کرائسس میکنیزم کے حوالے سے تفصیلی طور پر معاملات رواں برس دسمبر تک طے کر لئے جائیں گے۔ انہوں نے کہا کہ فرانس اور یورپ کے لئے بہتر راستہ مسائل سے منہ موڑنے میں نہیں بلکہ انہیں مؤثر انداز سے حل کرنے میں ہے۔

رپورٹ : عاطف توقیر

ادارت : افسر اعوان

DW.COM

ویب لنکس