1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

یمن میں تین غیرملکیوں کی لاشیں برآمد: ذرائع

یمن میں اغواء کئے گئے نو غیرملکی باشندوں میں سے آج پیر کے روز تین افراد کی لاشیں مل گئی ہیں۔ یمنی سیکیورٹی حکام کا کہنا ہے کہ یہ لاشیں تین جرمن عورتوں کی ہیں، جنہیں گذشتہ جمعرات یمنی علاقے صعدہ سے اغواء کیا گیا تھا۔

default

یمنی صوبے صعدہ میں گشت پر مامُور فوجی

یمنی حکام کے مطابق پولیس کو اَخوان کے علاقے میں تین غیر ملکی خواتین کی لاشیں ملی ہیں۔ جرمن خبررساں ادارے DPA نے یمنی سیکیورٹی ذرائع کے حوالے سے بتایا ہے کہ یہ لاشیں جرمن عورتوں کی ہی ہیں۔ ابھی تک جرمن حکومت نے اِن ہلاکتوں کی تصدیق نہیں کی ہے۔

Jemen Deutschland Entführung Soldat in Sanaa

فائل فوٹو: برقعہ پوش یمنی خواتین دارالحکومت صنعا میں

میڈیکل رپورٹ کے مطابق ان تینوں عورتوں کو گولی مار کر ہلاک کیا گیا ہے۔ ان تینوں کو گذشتہ جمعرات ضلع صعدہ سے ایک برطانوی، ایک کورین اور چار جرمن شہریوں سمیت اغواء کیا گیا تھا۔ اغوا شدگان میں دو بچے بھی شامل ہیں۔ اب تک کسی یمنی عسکریت پسند جماعت یا قبائلی گروہ نے اس واقعہ کی ذمےداری قبول نہیں کی ہے۔ اسی دوران امریکی ذرائع ابلاغ نے یہ دعویٰ کیا ہے کہ نو کے نو اغواشدگان کی لاشیں مل گئی ہیں، تاہم یمنی حکام نے ابھی اس کی تصدیق نہیں کی ہے۔

دبئی میں مقیم عرب امور کے ایک ماہر فارس بن حزام کے مطابق نو غیرملکیوں کے اغواء اور ان میں سے تین عورتوں کی ہلاکت میں القاعدہ کے ملوث ہونے کا امکان ہے۔ فارس بن حزام کا کہنا ہے کہ ان ہلاکتوں کا واضح تعلق یمن میں حالیہ دنوں میں القاعدہ کے ایک اہم رکن کی گرفتاری سے ہوسکتا ہے۔

یمنی حکام نے گذشتہ ہفتے ملک کے شمالی علاقوں میں موجود شیعہ باغی رہنما حاتی زیدی کے عسکریت پسند گروہ پر ان غیرملکیوں کو یرغمال بنانے کا الزام لگایا تھا۔ تاہم حا تی زیدی گروہ کے ایک ترجمان نے یمنی حکام کے اس دعویٰ کو بے بنیاد قرار دیتے ہوئے رد کر دیا ہے۔

Jemen Deutschland Entführung Polizei in Sanaa

یمنی دارالحکومت میں گشت کرنے واملی فوجی


اس سے قبل جمعرات ہی کے روز طبی امداد فراہم کرنے والے 28 غیر ملکی باشندوں کو یمنی علاقے عمران کے ایک ہسپتال سے اغواء کیا گیا تھا، تاہم قبائلی مذاکرات کے نتیجے میں انہیں ایک روز بعد ہی رہا کر دیا گیا۔

یمن جو کہ القاعدہ کے سربراہ اسامہ بن لادن کے آباؤ اجداد کا وطن ہے، معاشی طور پر خلیج کے خطے کی سب سے کمزور ریاست ہے۔ اس عرب ملک کے شمالی علاقے 2004ء سے باغی شیعہ عسکریت پسندوں کی کارروائیوں کی وجہ سے شدید شورش کا شکار ہیں، جبکہ جنوب کے پہاڑی علاقے القاعدہ کے عسکریت پسندوں اور علٰیحدگی پسند باغیوں کا گڑھ ہیں۔

یمن میں غیرملکی شہریوں کے اغوا کو مختلف قبائل کے مابین جوڑ توڑ، بھاری تاوان کے لالچ یا پھر حکومت مخالف عناصر کی رہائی کے لئے استعمال کیا جاتا ہے۔

DW.COM