1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

یقین دہانی کے باوجود مبینہ امریکی حملہ، اسلام آباد کا ردعمل

امریکی یقین دھانیوں کے باوجود مبینہ امریکی حملوں کا سلسلہ جاری ہے۔ ایک ہنگامی بریفنگ میں پاکستانی وزیر خارجہ شاہ محمود قریشی نے کہا کہ ہمیں اس حملے کے بارے میں کوئی پیشگی اطلاع نہیں دی گئی۔

default

امریکی جوائنٹ چیفس آف اسٹاف ایڈمرل مائیک مولن نے پاکستانی وزیر اعظم سید یوسف رضا گیلانی اور آرمی چیف جنرل اشفاق پرویز کیانی سے ملاقاتوں کے بعد پاکستانی حدود کے احترام کی یقین دہانی کرائی تھی تاہم انہیں پاکستان سے روانہ ہوئے چند گھنٹے ہی گزرے تھے کہ جنوبی وزیرستان میں انگور اڈا کے علاقے باغڑچینا میں مقامی باشندے کے گھر پر مبینہ طور پرمیزائل حملہ کیا گیا۔ پاکستانی وزیر خارجہ شاہ محمود قریشی نےایک خصوصی پریس بریفنگ میں کہا کہ میزائل حملوں سے ایسا لگتا ہے جیسے امریکی فوج اور خفیہ اداروں میں مکمل رابطہ نہیں۔

مشیر داخلہ رحمان ملک نے بھی میڈیا سے گفتگو کرتے ہوئے کہا کہ پاکستانی حدود میں کارروائیوں کے حوالے سےامریکہ کے ساتھ کوئی معاہدہ نہیں کیا گیا۔ پاکستان کی خود مختاری کی حفاظت کے لئے سفارتی کوششوں سمیت ہر ممکن اقدامات اٹھائے جائیں گے۔

DW.COM

Audios and videos on the topic