1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

ہاکی کیوں ماری، بھارتی کھلاڑی پر پابندی

بھارت میں کھیلے جارہے عالمی کپ ہاکی ٹورنامنٹ میں بھارتی سٹرائیکر شیونرا سنگھ پر تین میچوں کی پابندی عائد کردی گئی ہے۔

default

سہیل عباس بھارتی کھلاڑی چاندی سے گیند چھینتے ہوئے

اتوار کو پاکستان کے خلاف کھیلے گئے میچ میں سنگھ نے پاکستانی کھلاڑی فرید احمد کی آنکھ کے پاس ہاکی ماری تھی۔ فرید احمد کو معمولی سا زخم آیا تھا۔

ٹورنامنٹ ڈائریکٹر کین ریڈ کے مطابق سنگھ نے یہ عمل دانستہ طور پرکیا تھا۔ اگرچہ پاکستانی منتظمین نے واقعے کی شکایت نہیں کی تھی تاہم ٹورنامنٹ انتظامیہ نے از خود کارروائی عمل لاتے ہوئے ان فارم بھارتی سٹرائیکر پر تین میچوں کی پابندی عائد کر دی ۔

Hockey Team Indien

بھارتی ٹیم پاکستان کے خلاف اپنا پہلا میچ جیتنے کے بعد

بھارتی ٹیم نے اس فیصلے کے خلاف اپیل کرنے کا عندیہ دیا ہے۔ اگر اپیل مسترد کردی گئی تو بھارتی سٹرائیکر شیونرا سنگھ آسٹریلیا، اسپین اور انگلینڈ کے خلاف اہم مقابلوں میں ٹیم کو دستیاب نہیں ہوں گے۔

بھارتی ہاکی بورڈ کے سیکریٹری ناریندرا بٹرا کے مطابق اپیل کے لئے مقررہ چھ سو یورو کی فیس جمع کرادی گئی ہے۔

عالمی کپ کے ابتدائی میچ میں روایتی حریف بھارت نے پاکستان کو ایک کے مقابلے میں چار گول سے شکست دی تھی۔ بھارت اور پاکستان، دونوں ہی ٹیموں کو پانچ پانچ پینلٹی کارنرز ملے لیکن پاکستان ان کا فائدہ نہیں اٹھا سکا۔ پاکستان صرف ایک ہی پینلٹی کارنر کو گول میں تبدیل کرنے میں کامیاب رہا۔ ہاکی ورلڈ کپ ٹورنامنٹ کے موقع سیکیورٹی کے سخت ترین انتظامات کئے گئے ہیں، جن سے تماشائیوں کو خاصی پریشانیوں کا بھی سامنا کرنا پڑا ہے۔

رپورٹ: شادی خان سیف

ادارت: عاطف بلوچ

DW.COM