1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

کینیڈا ٹونٹی ٹونٹی کرکٹ ٹورنامنٹ کے لئے پاکستانی کرکٹ ٹیم کا اعلان

آج یعنی بدھ کی شام پاکستانی کرکٹ ٹیم کینیڈا میں کھیلے جانے والے چار ملکی ٹونٹی ٹونٹی کرکٹ ٹورنامنٹ کے لئے کینیڈا روانہ ہوگی۔ متنازعہ فاسٹ بولر شعیب اختر کو پندرہ رکنی پاکستانی ٹیم میں شامل کرلیا گیا ہے۔

default

پاکستانی کرکٹ بورڈ نے شعیب اختر پر عائد جرمانے کی رقم کی ادائیگی کے حوالے سے اپنے مطالبے میں لچک پیدا کردی ہے۔ اس سے قبل پاکستان کرکٹ بورڈ نے یہ واضح کیا تھا کہ جرمانے کی رقم ادا کرنے کے صورت میں ہی تینتیس سالہ فاسٹ بولر، شعیب اختر قومی اور بین الاقوامی سطح پر ٹیم کی نمائندگی کرسکیں گے۔

قومی ٹیم کے چیف سلیکٹر صلاح الدین احمد نے کہا ہے کہ پی سی بی کی طرف سے گرین سگنل ملنے کے بعد ہی شعیب اختر کو چار ملکی ٹورنامنٹ کے لئے اعلان شدہ سکواڈ میں شامل کرلیا گیا ہے۔

چار ملکی ٹونٹی ٹونٹی کرکٹ ٹورنامنٹ کا آغاز کینیڈا کے دارالحکومت ٹورنٹو میں دس اکتوبر سے ہورہا ہے۔ یہ مقابلے تیرہ اکتوبر تک جاری رہیں گے۔ مزکورہ ٹورنامنٹ میں پاکستان کے علاہ سری لنکا، زمبابوے اور میزبان ملک کینیڈا کی ٹیمیں حصّہ لینگی۔

Cricket

پندرہ رکنی پاکستانی ٹیم میں مایہ ناز بیٹسمین محمد یوسف کو شامل نہیں کیا گیا ہے تاہم پی سی بی کے چیف شفقت نغمی نے بتایا کہ ٹیم میں یوسف کے شامل نہ ہونے کی وجہ ان کی کارکردگی نہیں ہے بلکہ کینیڈا کے ہائی کمیشن سے ان کا پاسپورٹ ابھی تک واپس نہیں آیا ہے۔ ٹیم میں ’بوم بوم‘ شاہد خان آفریدی کو شامل کیا گیا ہے۔

سابق پاکستانی ٹیسٹ کرکٹر عامر سہیل نے ٹیم میں کچھ نئے کھلاڑیوں کی شمولیت پر اعتراض کرتے ہوئے سلیکشن کو ہدف تنقید بنایا ہے۔

عامر سہیل نے لاہور میں ہمارے نمائندے طارق سعید کو بتایا کہ زمبابوے اور بنگلہ دیش کی ٹیموں کے خلاف سابقہ سیریز میں ناصر جمشید سمیت کئی اور نوجوان کھلاڑیوں نے زبردست کارکردگی کا مظاہرہ کیا تھا لیکن اب وہ موجودہ ٹیم میں شامل ہی نہیں ہیں۔ ’’ ٹیم میں غیر معمولی تبدیلیاں کی گئی ہیں۔ افتتاحی بیٹسمین ناصر جمشید نے سلمان بٹ کے ساتھ مل کر اچھی بیٹنگ کی تھی لیکن اب آپ اچانک بغیر کسی وجہ کے اُس شراکت کو توڑ رہے ہیں۔ اسی طرح بولنگ کے شعبے میں بھی نئے چہرے نظر آرہے ہیں جبکہ ہمارے پاس پہلے سے آزمائے ہوئے بہترین گیندباز موجود ہیں۔‘‘

پاکستانی سکواڈ ان کھلاڑیوں پر مشتمل ہے: شعیب ملک )کپتان(، سلمان بٹ، خالد لطیف، شعیب خان، یونس خان، مصباح الحق، شاہد آفریدی، کامران اکمل، شعیب اختر، سہیل تنویر،عمر گل، فواد عالم، انور علی، سہیل خان، عبدالرٴوف۔