1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

کیا وین رونی چینی کلب جوائن کر رہے ہیں؟

اسٹار فٹ بالر وین رونی مانچسٹر یونائیٹڈ کی کپتانی چھوڑ کر ’چینی سپر لیگ‘ کا حصہ بن سکتے ہیں۔ رونی کے ایجنٹ اس وقت چین کے دورے پر ہیں جبکہ میڈیا کے مطابق وہ سابق انگلش کپتان کی ممکنہ ٹرانسفر پر بات چیت کے لیے چین گئے ہیں۔

خبر رساں ادارے اے ایف پی نے برطانوی میڈیا کے حوالے سے بتایا ہے کہ معروف انگلش فٹ بالر وین رونی ممکنہ طور پر انگلش پریمیئر لیگ سے علیحدگی اختیار کرتے ہوئے چینی سپر لیگ کا حصہ بن سکتے ہیں۔ چین نے ابھی حال ہی میں ملکی فٹ بال لیگ میں بڑے پیمانے پر سرمایہ کاری کا اعلان کیا تھا۔

انگلش پریمیئرلیگ کا بہترین گول رونی نے کیا

انگلش فُٹ بال سٹار رونی کا ہُنر اور غصّہ

اطلاعات ہیں کہ اکتیس سالہ وین رونی اپنے کلب مانچسٹر یونائیٹڈ کے مینیجر خوزے مورینیو کی طرف سے بے اعتنائی کا شکار ہیں، اس لیے وہ اس کلب کو خیرباد کہنے کا سوچ رہے ہیں۔ دوسری طرف چینی سپر لیگ کے متعدد کلب رونی کو اپنی ٹیم میں شامل کرنے کے لیے تیار ہیں۔ رونی جیسے معروف فٹ بال اسٹار کی چینی سپر لیگ میں شمولیت چینی فٹ بال کے لیے بھی ایک اہم قدم جست ثابت ہو گی۔

برطانوی میڈیا کے مطابق اگر رونی کسی چینی کلب میں شمولیت اختیار کرتے ہیں تو انہیں ایک ہفتے کا ایک ملین ڈالر معاوضہ ادا کیا جا سکتا ہے۔ اگر یہ قیاس آرائیاں درست ثابت ہو گئیں تو اس طرح رونی دنیا کے مہنگے ترین فٹ بالر ہونے کا اعزاز بھی حاصل کر لیں گے۔

رونی کا مانچسٹر یونائیٹڈ کے ساتھ موجودہ معاہدہ سن دو ہزار اٹھارہ کے وسط تک ختم ہو جائے گا جبکہ اس کنٹریکٹ میں مزید ایک سال کی توسیع کا امکان بھی موجود ہے۔ تاہم رونی اور کلب مینیجر مورینیو کے باہمی تعلقات میں اختلافات کی خبروں کے باعث ایسے اندازے شدید ہوتے جا رہے ہیں کہ رونی اب مزید اس کلب میں نہیں رہیں گے۔

Fußball San Marino England EM-Qualifikation Wayne Rooney (Reuters/C. Recine)

انگلینڈ کی قومی فٹ بال ٹیم کے ٹاپ اسکورر رونی 119 میچوں میں اپنے ملک کی نمائندگی کر چکے ہیں

مورینیو نے ایک تازہ پریس کانفرنس میں کہا کہ رونی کو اپنے مستقبل کا فیصلہ خود کرنا ہے۔ انہوں نے واضح کیا کہ وہ کبھی بھی رونی پر زور نہیں دیں گے کہ وہ کلب کو چھوڑ دیں۔ تاہم انہوں نے مزید کہا، ’’میں ضمانت نہیں دے سکتا۔ مجھے یہ معلوم نہیں کہ آئندہ ہفتے تک میں خود بھی اس کلب کا مینیجر رہو‌ں گا یا نہیں۔ اس صورتحال میں یہ کیسے کہا جا سکتا ہے کہ رونی اگلے سیزن میں اس کلب میں ہی ہوں گے۔‘‘

انگلینڈ کی قومی فٹ بال ٹیم کے ٹاپ اسکورر رونی 119 میچوں میں اپنے ملک کی نمائندگی کر چکے ہیں۔ انگلینڈ کے لیے سب سے زیادہ میچ کھیلنے کا ریکارڈ پیٹر شیلٹن کے پاس ہے، جنہوں نے 125 بین الاقوامی میچوں میں انگلش ٹیم کی نمائندگی کی۔ رونی پہلے ہی کہہ چکے ہیں کہ وہ روس میں ہونے والے آئندہ عالمی کپ مقابلوں کے بعد بین الاقوامی فٹ بال سے ریٹائرمنٹ لے لیں گے۔

DW.COM