1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

کرکٹ: پاکستان اور سری لنکا کی سیریز اکتوبر سے

پاکستان کرکٹ بورڈ نے بتایا ہے کہ پاکستان اور سری لنکا کی قومی کرکٹ ٹیمیں اٹھارہ اکتوبر سے متحدہ عرب امارات میں ٹیسٹ، ون ڈے اور ٹی ٹوئنٹی سیریز کھیلیں گی۔

default

متحدہ عرب امارات میں پاکستان اور سری لنکا کے درمیان کرکٹ سیریز کے منعقد کیے جانے کی وجہ پاکستان میں سکیورٹی کے مسائل ہیں۔ پاکستان کرکٹ بورڈ کی جانب سے جاری کردہ ایک بیان کے مطابق یہ سیریز اٹھارہ اکتوبر تا چھبیس نومبر کھیلی جائے گی۔ اس سیریز میں تین ٹیسٹ میچ، پانچ ایک روزہ میچ اور ایک ٹوئنٹی ٹوئنٹی میچ کھیلے جائیں گے۔ کرکٹ بورڈ کی جانب سے یہ بیان منگل کے روز جاری کیا گیا ہے۔

NO FLASH World Cup Cricket 2011 Finale Indien Sri Lanka

سری لنکا کی ٹیم نے گزشتہ ورلڈ کپ میں اچھی کارکردگی دکھائی تھی

اس سیریز کے انعقاد سے شارجہ کرکٹ اسٹیڈیئم میں ٹیسٹ کرکٹ کا احیاء بھی ہو رہا ہے، جہاں گیارہ برس بعد ٹیسٹ میچ کھیلا جائے گا۔ سن دو ہزار دو میں پاکستان اور آسٹریلیا نے اس اسٹیڈیئم میں آخری بار ٹیسٹ میچ کھیلا تھا۔ خیال رہے کہ سری لنکا نے پاکستان کی سرزمین پر سکیورٹی سے متعلق تحفظات کی بنا پر سیریز کھیلنے سے انکار کیا ہے۔ مارچ دو ہزار نو میں پاکستان کے شہر لاہور میں سری لنکن کرکٹ ٹیم پر دہشت گردانہ حملہ ہوا تھا، جس میں ٹیم بال بال بچ گئی تھی۔ اس کے بعد سے پاکستان کی سرزمین پر بین الاقوامی کرکٹ نہیں کھیلی جا رہی ہے۔

پاکستان کرکٹ بورڈ کے مطابق سیریز کے میچز دبئی، شارجہ اور ابوظہبی میں کھیلے جائیں گے۔ پاکستانی بورڈ کے افسر سبحان احمد کے مطابق، ’’ہمارے پاس سیریز منعقد کروانے کے لیے کئی ممالک کے آپشنز تھے مگر ہم نے متحدہ عرب امارات کا انتخاب کیا کیوں کہ وہاں ہم چیزیں آسانی کے ساتھ طے کر سکتے ہیں۔‘‘

رپورٹ: شامل شمس⁄  خبر رساں ادارے

ادارت: عاطف توقیر

DW.COM