1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

کرن جوہر شادی اور بیوی کے بغیر باپ بن گئے

بھارتی فلم انڈسٹری سے تعلق رکھنے والے کرن جوہر بالی ووڈ کی ایک مشہور شخصیت ہیں۔ انہوں نے ابھی تک شادی نہیں کی لیکن وہ جڑواں بچوں کے باپ بن گئے ہیں۔

کرن جوہر کو باپ بننے کے لیے ایک کرائے کی ماں کا سہارا لینا پڑا جس نے کرن جوہر کے لیے جڑواں بچے کیے۔ ان میں ایک لڑکا اور ایک لڑکی ہے۔ کرن جوہر کے مطابق نومولود بچے کا نام یَش اور بچی کا نام رُوحی رکھا گیا ہے۔

اس مناسبت سے کرن جوہر نے اپنے ایک پیغام میں کہا کہ یہ اُن کے لیے انتہائی جذباتی صورت حال ہے اور وہ باپ بننے کی کیفیت کو الفاظ میں بیان کرنے سے قاصر ہیں۔ کرن جوہر نے یہ بھی کہا کہ والدین کی ذمہ داریوں اور فرائض کا بغور مشاہدہ اور مطالعہ کرنے کے بعد ہی انہوں نے یہ فیصلہ کیا کہ وہ ایک کرائے کی ماں کے ذریعے اولاد حاصل کریں گے۔

بھارتی فلمی صنعت بالی ووڈ کے مشہور ہدایتکار اور فلم ساز کرن جوہر نے باپ بننے کے موقع پر اپنے بیان میں کہا کہ وہ عورت جس نے اُن کے لیے بچوں کو جنم دیا ہے، وہ اُس کے انتہائی مشکور و ممنون ہیں کیونکہ اُس کے مکمل تعاون ہی سے وہ اپنے ایسے ایک خواب کی تکمیل کر پائے ہیں، جو وہ برسوں سے دیکھ رہے تھے۔

Isha Ambani (Getty Images/AFP/STR)

کرن جوہر ممتاز صنعت کار مکیشن امبانی کی بیٹی ایشا کے ہمراہ

یہ امر اہم ہے کہ کرن جوہر نے ابھی تک شادی نہیں کی ہے اور وہ سنگل ہیں۔ ممبئی کے بعض سماجی حلقے اُن کے ہم جنس پرست ہونے کے بھی اشارے دیتے ہیں۔ بھارتی فلم انڈسٹری کے وہ پہلے فرد نہیں ہیں جنہوں نے کرائے کی ماں کی سہولت حاصل کی ہے۔ بھارت کے مشہور اداکار شاہ رخ خان اور اُن کی بیوی گوری خان نے بھی تیسرے بچے کے حصول کے لیے ایک کرائے کی ماہ کا سہارا لیا تھا۔

بھارت میں سن 2001 سے کرائے کی ماں حاصل کرنے میں بظاہر کوئی قانونی پیچیدگی حائل نہیں ہے۔ نریندر مودی کی قیادت میں قائم موجودہ قوم پرست حکومت نے واضح طور پر کہا ہے کہ وہ اس صورت حال کا جائزہ لیتے ہوئے اس قانون کو ختم کرتے ہوئے کرائے کی ماں کے حصول کو ناممکن بنا دیں گے۔ سماجی حلقوں کے مطابق بھارت میں ’کرائے کی ماں‘ غریب بستیوں میں کمائی کا ایک بڑا ذریعہ تصور کیا جاتا ہے۔