1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

کرغزستان میں امریکی بیس کی بندش؟

کرغزستان نے اپنی سرزمین پر قائم امریکی فضائی اڈہ بند کرنے کا فیصلہ کر لیا ہے۔

default

امریکی جنگی طیارہ ائیر بیس پر اترتے ہوئے

اب خطے میں ایک نئی بحث چھڑ گئی ہے کہ افغانستان میں متعین نیٹو دستوں کی مدد کے لئے کام کرنے والا یہ اڈہ بند ہوا تو دہشت گردی کے خلاف جنگ کیا رُخ اختیار کرے گی۔

نیٹو پہلے ہی اس بات کا اعلان کر چکی ہے کہ افغانستان میں القاعدہ اور طالبان کے خلاف جاری لڑائی کا انجام ابھی دُور ہے۔ اس اثنا میں کرغزستان کی حکومت کی جانب سے مناس بیس کی بندش کا فیصلہ اتحادی افواج کے لئے کسی دھچکے سے کم نہیں۔ پاکستان میں دفاعی تجزیہ نگار اکرام سہگل نے ڈوئچے ویلے سے گفتگو میں کہا کہ یہ بیس بند ہوئی تو افغانستان میں نیٹو افواج کی کارروائیاں متاثر ہوں گی: "وہ بیس سرچ اینڈ ریسکیو کی حکمت عملی کے تحت قائم کی گئی تھی جس سے وہ افغانستان میں فضائی کارروائیاں کرتے ہیں۔ اس لئے انہیں فرق پڑےگا۔"

یہ امریکی بیس کرغز دارالحکومت بیشکیک کے قریب واقع ہے۔ ذرائع ابلاغ کی رپورٹوں کے مطابق روس اس امریکی اڈے کی خطے میں موجودگی سے خوش نہیں جبکہ چین بھی اس اڈے کی بندش کا خواہاں ہے۔ تاہم ماسکو میں ایک اعلیٰ حکومتی عہدے دار کا کہنا ہے کہ روس سپلائی راستوں کے سلسلے میں اتحادی فوجوں سے تعاون کرے گا۔ اس بارے میں دفاعی تجزیہ نگار اکرام سہگل کہتے ہیں کہ روس اتحادی فوجوں کو سپلائی روٹ فراہم کر سکتا ہے لیکن خطے میں امریکی ایئر بیس کی موجودگی برداشت نہیں کر سکتا: "ایئربیس ان کے لئے خطرہ ہے، سپلائی روٹ سے ان کو کیا فرق پڑتا ہے۔"

CIA Flüge Deutschland US Air Base Ramstein

ائیر بیس کی بندش کے دہشت گردی کے خلاف جنگ پر اثرات اس وقت دفاعی حلقوں میں موضوع گفتگو ہیں

کرغز صدر کُرمان بیک باقی ائیف نے اس بیس کو بند کرنے کا اعلان اپنے حالیہ دورہ ماسکو کے دوران کیا جبکہ کرغزستان میں روس کا اپنا بھی ایک فوجی اڈہ موجود ہے۔ کرغز صدر کے دورہ روس کے دوران ماسکو حکومت نے بیشکیک کے لئے دو بلین ڈالر کی امداد کا اعلان بھی کیا ہے۔ تاہم ماسکو اور بیشکیک حکومتوں نے ان خبروں کی تردید کی ہے کہ کرغزستان کے لئے اس امدادی پیکیج کا مناس بیس کی بندش سے کوئی تعلق ہے۔ روسی حکام کا کہنا ہے کہ یہ فیصلہ کرغزستان کا اندرونی معاملہ ہے۔

بیشکیک میں امریکی سفارت ‌خانے کے ایک بیان میں کہا گیا ہے کہ کرغزستان کی حکومت اور عوام کے لئے امریکہ متعدد پروگرام شروع کرنا چاہتا ہے۔ اس سے ظاہر ہوتا ہے کہ واشنگٹن بیشکیک حکومت کو اس بیس کی بندش سے روکنے کی کوششیں کررہا ہے۔

بیشکیک میں سیاسی تجزیہ نگاروں کے مطابق ان کوششوں کو آگے بڑھانے کے لئے امریکی محکمہ خارجہ کا ایک وفد آئندہ ہفتے کرغزستان جائے گا۔ کرغز وزیر اعظم ایگور خودینوف کا کہنا ہے کہ اس حوالے سے امریکی حکام سے مذاکرات جاری ہیں۔

کارنیگی ماسکو سینٹر سے وابستہ وسطی ایشیائی امور کے ماہر آلیکسی مالاشینکو نے کہا ہے کہ کرغز صدر بحران زدہ ملکی معیشت کو سہارا دینے کے لئے دباؤ کے تحت کام کر رہے ہیں۔

مناس بیس 2001 میں نیویارک اور واشنگٹن پر دہشت گردانہ حملوں کے بعد افغانستان میں طالبان کے خلاف کارروائی میں مدد کے لئے قائم کی گئی تھی۔ وہاں تقریبا ایک ہزار امریکی اہلکار تعینات ہیں۔