1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

کراچی میں شوکت خانم کینسر ہسپتال کی بنیاد رکھ دی گئی

پاکستان کے سب سے بڑے شہر کراچی میں تیسرے شوکت خانم کینسر ہسپتال کی بنیاد رکھ دی گئی ہے۔ اس ہسپتال سے سندھ کے غریب عوام کو طبی سہولیات فراہم کی جائیں گی۔

شوکت خانم ہسپتال کے ٹوئٹر اکاؤنٹ پر جاری تفصیلات کے مطابق عمران خان نے تقریب سے خطاب کرتے ہوئے کہا،’’شوکت خانم کراچی ہسپتال ہماری زندگیوں کے بعد بھی کئی ہزار مریضوں کو طبی سہولیات فراہم کرتا رہے گا۔‘‘ عمران خان نے شوکت خانم ہسپتال میں کام کرنے والے تمام افراد کو خراج تحسین پیش کیا۔

تیسرے شوکت خانم میموریل کینسر ہسپتال اور ریسرچ سینٹر کا مقصد سندھ کے غریب عوام کو سرطان کے مرض کے علاج کی سہولیات فراہم کرنا ہے۔ عمران خان نے تقریب سے خطاب کرتے ہوئے کہا،’’میں ہسپتال میں کام کرنے والے تمام افراد کا شکریہ ادا کرتا ہوں جنہوں نے امیروں اور غریبوں کو ایک جیسی طبی سہولیات فراہم کیں۔‘‘

عمران خان نے کہا،’’سرطان کے ہسپتالوں کے لیے سات سو ملین روپے اکٹھا کرنا آسان نہیں تھا، مجھے یہ معلوم نہیں تھا کہ یہ سفر اتنا کٹھن ہوگا۔‘‘ عمران خان نے کہا کہ تیسرے ہسپتال کی تکمیل یہ ظاہر کرتی ہے کہ پاکستانی قوم مل کر کیا کر سکتی ہے۔ شوکت خانم کینسر ہسپتال کا سنگ بنیاد کینسرکے مرض میں مبتلا دس سالہ بچے ولید احمد نے رکھا۔

سوشل میڈیا پر کئی افراد نے عمران خان کی اس کاوش پر انہیں مبارک باد دی۔ صحافی اجمل جامی نے اپنی ایک ٹوئٹ میں لکھا،’’عمران خان نے آج ایک بہترین غیر سیاسی تقریر کی۔‘‘

پیپلز پارٹی کے رکن اعتزاز احسن نے لکھا،’’ اس بہترین سماجی کام کی کامیابی کا سہرا عمران خان کو جاتا ہے۔‘‘

ایک سوشل میڈیا صارف نے لکھا،’’یہ ہسپتال عمران خان کی طرف سے ان کی والدہ کے لیے بہترین خراج عقیدت ہے۔‘‘

زوہیب خان نے لکھا،’’جس انسان کی ماں نے کینسر سے جان دی، اس کے بیٹے نے اس قوم کی ماؤں کی زندگیاں بچانے کے لئے کینسر ہسپتال بنایا۔‘‘

عدنان چاولہ نے لکھا،’’تین کینسر ہسپتال اور پھر ستر فیصد مریضوں کو مفت علاج کی سہولت فراہم کرنا کوئی آسان کام نہیں ہے۔‘‘