1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

کراچی میں امن کی بحالی کے لیے فوج مدد کو تیار، جنرل کیانی

پاکستانی فوج کے سربراہ جنرل اشفاق پرویز کیانی نے کہا ہے کہ فوج حکومت کی درخواست پر کراچی میں سیاسی اور نسلی بنیادوں پر ہونے والے تشدد کے سلسلے پر قابو پانے میں مدد دینے کے لیے تیار ہے۔

default

جنرل اشفاق کیانی

جرمن خبر رساں ادارے ڈی پی اے نے انگریزی روزنامہ دی نیوز کی خبر کے حوالے سے بتایا کہ جنرل کیانی نے پاکستان کے سب سے بڑے شہر میں سیکورٹی کی صورتحال پر گہری تشویش ظاہر کرتے ہوئے کہا کہ اگر حکومت نے کراچی میں بدامنی پر قابو پانے کے لیے فوج کو طلب کیا تو وہ مدد دینے کے لیے تیار ہے۔

تاہم ان کا یہ بھی کہنا تھا کہ اگر پولیس اور رینجرز کو موزوں طریقے سے تعینات کیا جائے تو وہ بدامنی پر قابو پا لیں گے۔ انہوں نے کہا، ’’کراچی ملک کی معیشت کی شہ رگ ہے اور اگر امن و امان کی صورتحال یونہی بگڑتی رہی تو یہ بڑی ناانصافی کی بات ہو گی۔‘‘

Unruhen Karachi Mord Politiker Pakistan

جنرل کیانی نے کہا ہے کہ اگر پولیس اور رینجرز کو موزوں طریقے سے تعینات کیا جائے تو وہ بدامنی پر قابو پا لیں گے

جنرل کیانی نے ان خیالات کا اظہار ایسے موقع پر کیا ہے،جب ملک کے تجارتی مرکز کراچی میں گزشتہ چند روز سے جاری بدامنی کی نئی لہر کے بعد سیاسی جماعتوں اور کاروباری گروپوں کی جانب سے یہ مطالبہ بڑھنے لگا ہے کہ صورتحال پر قابو پانے کے لیے فوج طلب کی جائے۔

تجزیہ کاروں کا کہنا ہے کہ فوج کے لیے اس وقت کراچی میں مداخلت کے مطالبات پر توجہ دینا مشکل نظر آتا ہے کیونکہ وہ پہلے ہی طالبان اور دیگر اسلامی عسکریت پسندوں کی شورش پر قابو پانے میں مصروف ہے۔

پاکستان کی 64 سالہ تاریخ میں سے نصف سے زائد عرصے تک ملک پر فوج کی حکمرانی رہی ہے اور اسے ملک میں سب سے مؤثر ادارہ تصور کیا جاتا ہے۔

کراچی میں تشدد، نسلی و لسانی فسادات اور سیاسی تنازعات کی ایک طویل تاریخ رہی ہے۔ بتایا جاتا ہے کہ حالیہ بدامنی کی لہر تین بڑی سیاسی جماعتوں سے تعلق رکھنے والے گروہوں کی جانب سے اپنے اثر و رسوخ میں اضافے کی کوششوں کا شاخسانہ ہے۔ کراچی پاکستان کا سب سے بڑا شہر ہے اور قومی خزانے میں دو تہائی ٹیکس ادا کرتا ہے۔ ملک کی اہم بندرگاہ ہونے کے علاوہ وہاں اسٹاک ایکسچینج، مالیاتی بینک اور دیگر اہم اداروں کے دفاتر قائم ہیں۔ 1990ءکی دہائی میں بھی فوج نے کراچی میں آپریشن کیا تھا۔

رپورٹ: حماد کیانی

ادارت: عاطف بلوچ

DW.COM