1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

چین میں طیارہ حادثے کا شکار، 43 افراد ہلاک

چین میں لینڈنگ کے دوران ایک ہوائی جہاز کے حادثے میں ہلاک ہونے والوں کی تعداد 43 ہو گئی ہے جبکہ بچائے گئے تقریباً 53 زخمی مسافروں کو علاج معالجے کے لئے ہسپتال پہنچایا گیا ہے۔

default

یہ حادثہ چین کے شمال مشرقی صوبے ہیلونگ جیانگ میں منگل کے روز پیش آیا۔ حکام کے مطابق یہ حادثہ اُس وقت پیش آیا، جب یہ طیارہ لینڈ کر رہا تھا۔ لینڈنگ کے دوران یہ ہوائی جہاز اچانک آگ کے شعلوں کے ساتھ تباہ ہو گیا۔ چین کے ریاستی میڈیا کے مطابق ’دی ہینان ایئر لائنز‘ کا جہاز صوبے ہیلونگ جیانگ کے شہر یچون کے ایئر پورٹ کے رَن وے پر تباہ ہو گیا۔

ابھی تک حادثے کی وجوہات کے بارے میں سرکاری طور پر کچھ نہیں کہا گیا ہے۔ جہاز کے بلیک باکس فلائٹ ڈیٹا ریکارڈر کی تلاش جاری ہے۔

China / Flugzeugunglück / Henan Airlines / Bruchlandung

امدادی کارکن بچاوٴ اور راحت کی کارروائی میں مصروف

تاہم سرکاری ٹیلی وژن کی رپورٹوں میں بتایا گیا ہے کہ یہ طیارہ شہر یچون میں گہری دھند کے دوران اُترتے وقت رَن وے سے آگے نکل گیا اور آگ کے شعلوں کی لپیٹ میں آ گیا۔ ہینان ایئر لائنز کا یہ طیارہ صوبے ہیلونگ جیانگ کے دارالحکومت ہاربن سے آ رہا تھا۔

حکام کے مطابق جہاز کے اس حادثے کے نتیجے میں کم از کم تینتالیس افراد مارے گئے ہیں، جن کی نعشیں بر آمد کر لی گئی ہیں۔ حکام نے بتایا کہ حادثے کی وجہ سے جہاز کے دو ٹکڑے ہو گئے تھے۔ ملبے میں پھنسے 53 مسافروں کو زندہ بچا لیا گیا اور اُنہیں ہسپتال پہنچا دیا گیا۔

چینی خبر رساں ادارے سنہوا کے مطابق عملے نے حادثے سے چند لمحے پہلے کیبن سے کئی مسافروں کو باہر پھینکا۔ جہاز میں پانچ بچوں سمیت کل اکیانوے مسافر سوار تھے جبکہ جہاز کا عملہ پانچ اراکین پر مشتمل تھا۔

حادثہ مقامی وقت کے مطابق ساڑھے نو بجے شب پیش آیا۔ اس جہاز نے اپنی پرواز صوبے ہیلونگ جیانگ کے دارالحکومت ہاربن سے شروع کی تھی اور محض چالیس منٹ کی پرواز کے بعد یہ حادثہ پیش آ گیا۔

مقامی ٹیلی وژن چینلز نے حادثے کی فوٹیج دکھائی۔ جہاز میں آگ لگنے کے فوراً بعد آگ بجھانے والے عملے نے رَن وے پر پہنچ کر آگ پر قابو پا لیا۔ ایئر کرافٹ ERJ-190 نامی جیٹ مسافر طیارہ برازیل کے ایرو سپیس اتحاد ایمبریئر کا تیار کردہ ہے۔

رپورٹ: خبر رساں ادارے / گوہر نذیر گیلانی

ادارت: امجَد علی

DW.COM