1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

چارسدہ میں دہشت گردانہ حملہ

پاکستان کے شمال مغربی علاقے چارسدہ میں منگل کے روز ایک مقامی عدالت کے باہر پہلے مسلح افراد اور پولیس کے درمیان فائرنگ کا تبادلہ ہوا، جب کہ بعد میں ایک بڑا دھماکا سنا گیا۔

خبر رساں ادارے ایسوسی ایٹڈ پریس کے مطابق ایک یا دو مسلح حملہ آوروں نے عدالت کی عمارت میں داخل ہونے کی کوشش کی، تاہم وہاں موجود پولیس اہلکاروں نے انہیں اندر داخل ہونے سے روکا، جس کے بعد فائرنگ شروع ہو گئی۔

مقامی پولیس افسر سجاد خان نے بتایا کہ اس واقعے میں ایک یا دو حملہ آور ملوث تھے، تاہم بعد میں شدید نوعیت کا ایک دھماکا ہوا۔ فی الحال اس دھماکے کی وجوہات معلوم نہیں ہوئی ہیں۔

ایک سینیئر حکومتی افسر نے کہا ہے کہ اس واقعے میں متعدد افراد کی ہلاکتوں کا خدشہ ہے، جب کہ کئی افراد ممکنہ طور پر زخمی بھی ہوئے ہیں۔ بتایا گیا ہے کہ یہ واقعہ چارسدہ ضلعے کے ٹنگی نامی علاقے میں پیش آیا۔

گزشتہ ایک ہفتے کے اندر پاکستان میں متعدد مقامات پر خودکش بم حملے ہوئے ہیں، جن میں مجموعی طور پر سو افراد ہلاک ہوئے۔ اس حوالے سے سب سے خون ریز واقعہ جنوبی صوبہ سندھ کے علاقے سیہون کی مشہور درگاہ میں پیش آیا، جہاں ایک خودکش بمبار نے زائرین کے درمیان خود کو اڑا دیا۔ اس واقعے میں پچاس سے زائد افراد ہلاک اور سو سے زائد زخمی ہوئے۔