1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

پولیس ہیڈکوارٹرز سے لاکھوں یورو اور دو کلو سونا چوری

یورپی یونین کے رکن ملک کروشیا کی پولیس چوری کے ایک ایسے واقعے کی چھان بین کر رہی ہے، جس میں چوروں نے کروشیائی پولیس کے ہیڈکوارٹرز سے لاکھوں یورو کی نقد رقم کے علاوہ قریب دوکلوگرام سونا بھی چرا لیا۔

کروشیا کے دارالحکومت زغرب سے پیر چار اپریل کو ملنے والی نیوز ایجنسی ایسوسی ایٹڈ پریس کی رپورٹوں کے مطابق اس نقب زنی کے دوران نامعلوم چور نقدی کی صورت میں دو لاکھ 80 ہزار یورو (قریب تین لاکھ 20 ہزار امریکی ڈالر) کے علاوہ دو کلوگرام (4.4 پاؤنڈ) سونا بھی چرا لے گئے۔

ملکی پولیس کے میڈیا آفس کی ایک خاتون افسر ہیلینا بیئوچچ نے آج یہ تصدیق تو کر دی کہ کروآٹ پولیس کو اپنے ہی صدر دفاتر میں نقب زنی کی ایک بڑی واردات کا سامنا ہے تاہم انہوں نے اس بارے میں کوئی بھی تفصیلات بتانے سے انکار کر دیا۔

زغرب میں پولیس کے میڈیا آفس کی طرف سے تصدیق سے قبل آج پیر ہی کے روز Jutarnji List نامی ایک کروآٹ روزنامے نے اپنی ایک رپورٹ میں نہ صرف اس نقب زنی کی اطلاع دی تھی بلکہ یہ بھی لکھا تھا کہ چور جاتے وقت کیا کچھ ساتھ لے گئے۔

اس رپورٹ کے مطابق یہ چوری کروشیائی پولیس کے ہیڈکوارٹرز میں منظم جرائم کی روک تھام کے شعبے کے سربراہ زَیلکو دولاکی کے دفتر سے کی گئی، جس کے لیے چور، جن کی ممکنہ تعداد کے بارے میں کچھ نہیں کہا جا سکتا، آتشزدگی کی صورت میں ہنگامی انخلا کے لیے استعمال ہونے والی سیڑھیوں کے راستے پولیس چیف دولاکی کے دفتر تک پہنچے تھے۔

اخبار کے مطابق چوری کی یہ واردات اتوار تین اپریل اور پیر چار اپریل کی درمیانی شب کی گئی۔ پولیس کو اس واردات کا علم تب ہوا جب پیر کے روز دفتر کھلنے پر حکام نے اس دفتر میں رکھی گئی سیف کو کھلا پایا۔ اس سیف کو زمین پر الٹا دیا گیا تھا اور وہ خالی تھی۔