1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

پاک بھارت ڈیڈ لاک ختم ہو گیا ہے، سرتاج عزیز

پاکستانی وزیر اعظم کے مشیر خارجہ سرتاج عزیز نے ڈی ڈبلیو سے خصوصی بات چیت میں کہا کہ پاک بھارت ڈائیلاگ میں قائم ڈیڈ لاک ختم ہو گیا ہے اور امید ہے کہ بھارتی وزیر خارجہ کے ساتھ کشمیر سمیت تمام اہم امور پر بات چیت ہو گی۔

ڈی ڈبلیو سے خصوصی گفتگو کرتے ہوئے پاکستانی وزیراعظم کے مشیر خارجہ سرتاج عزیز نے کہا کہ،’’ پاکستان اور بھارت کے مذاکراتی عمل میں موجود ڈیڈ لاک ختم ہو گیا ہے اور امید ہے کہ اگلے ہفتے اسلام آباد میں ہونے والے پاکستان اور بھارت کے وزرائے خارجہ کے مابین ہونے والے مذاکرات میں جموں کشمیر سمیت تمام اہم معاملات پر بات چیت ہو گی۔‘‘

واضح رہے کہ 30 نومبر کو پاکستان اور بھارت کے وزرائے اعظم کے مابین کلائمیٹ چینج سمٹ کے موقع پر پیرس میں ملاقات ہوئی تھی جس کے بعد آج اتوار کو بینکاک میں پاک بھارت قومی سلامتی مشیروں اور دونوں ممالک کے سکریٹری خارجہ کے مابین ایک ملاقات ہوئی ہے، جسے پاک بھارت مذاکرات کے آغاز میں اہم پیش رفت سمجھا جا رہا ہے۔

سرتاج عزیز اگلے ہفتے اسلام آباد میں ہونے والے پاک بھارت وزرائے خارجہ مذاکرات کو ایک اہم اور مثبت پیش رفت خیال کر رہے ہیں۔ ڈی ڈبلیو کو انہوں نے بتایا، ’’اوفا میں اس بات پر اتفاق ہوا تھا کہ پاکستان اور بھارت کے درمیان جامع مذاکرات کا سلسلہ شروع ہونا چاہیے۔ دیکھنا یہ ہو گا کہ بھارتی وزیر خارجہ سشما سوراج کے ساتھ مذاکرات کے بعد یہ عمل آگے کیسے بڑھایا جائے گا‘‘۔

2014 میں بھارت میں نئی حکومت کے قیام کے بعد پاک بھارت مذاکراتی عمل تعطّل کا شکار تھا اور اس دوران دونوں ممالک میں لائن آف کنٹرول پر کئی جھڑپیں ہو چکی ہیں، جن میں عام شہری اور دونوں ممالک کے متعدد فوجی بھی ہلاک ہو چکے ہیں۔ دونوں ممالک ایک دوسرے کو ان جھڑپوں کا ذمہ دار قرار دیتے رہے۔ دونوں ممالک کے قومی سلامتی کے مشیروں کے مابین مذاکرات اگست 2015 میں بھی ملاقات شروع ہونے سے چند گھنٹوں قبل منسوخ کر دیے گئے تھے۔