1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

پاکستان T20 سیریز ہارگیا

کئی طرز کی مشکلات میں گھری پاکستانی کرکٹ ٹیم انگلینڈ سے ٹوئنٹی ٹوئنٹی میچز کی سیریز بھی ہارگئی۔ دونوں میچوں میں ٹیم کی مجموعی کارکردگی مایوس کن رہی ہے۔

default

انگلش کپتان کولنگ ووڈ

دوسرے اور حتمی مقابلے میں پاکستانی بیٹنگ لائن 89 پر ہی ڈھیر ہوگئی تھی۔ ویلز علاقے کےکارڈیف شہر کے صوفیہ گارڈن میں کھیلے گئے میچ کا ٹاس پاکستانی کپتان شاہد خان آفریدی نے جیت کر بلے بازی کا فیصلہ کیا۔

شاہ زیب حسن اور کامران اکمل کی اوپننگ جوڑی زیادہ دیر وکٹ پر نہ ٹھہرسکی اور گیارہ کے مجموعی سکور پر کامران اکمل پویلین لوٹ گئے۔ انہوں نے انگلش گیند باز سائڈبوٹم کے پہلے اوور میں گیارہ رنز حاصل کر کے اننگز کا دلچسپ آغاز کر دیا تھا۔ اکمل کے بعد آنے والے بلے باز بھی مکمل طور پر بے بس اور ناکام دکھائی دئے۔

Muhammad Yousuf

محد یوسف چار رنز بناسکے

تجربہ کار محمد یوسف کو ان کی اننگ کے شروعات ہی میں ایک چانس ملا تاہم وہ اس کا فائدہ نہ اٹھاسکے۔ اٹھارہ کے مجموعی سکور پر یوسف بھی اکمل کی طرح پُل شاٹ کھیلنے کی کوشش میں باؤنڈری پر کھڑے فیلڈر کو کیچ دے بیٹھے۔

کپتان شاہد آفریدی نے بیٹنگ آرڈر میں تبدیلی کی اور فواد عالم کی جگہ عمر اکمل کو میدان میں بھیجا۔ پانچویں اوور میں ٹیم کا سکور ابھی 20 رنز تک ہی پہنچا تھا کہ شاہ زیب ایک تیز باؤنسر کو فائن لیگ کی جانب کھیلنے کی کوشش میں ناکام ہوئے اور براڈ کی یہ گیند ان کے دستانے کو چھوتی ہوئی وکٹ کیپر ڈیویز کے محفوظ ہاتھوں میں چلی گئی۔

کپتان آفریدی خود میدان میں اترے۔ بوم بوم آفریدی کا جادو بھی صوفیہ گارڈن میں نہ چل سکا۔ نوے میل فی گھنٹہ کی رفتار سے آنے والی سٹوارٹ براڈ کی ایک گیند کو آفریدی نے زوردار طریقے سے سویپ کرنا چاہا مگر گیند بلے کا کنارہ لیتی ہوئی ہوا میں چلی گئی جسے مورگن نے کیچ کیا۔

Pakistan Cricket Yasir Hameed

سپاٹ فکسنگ کے حوالے سے یاسر حمید کا کہنا ہے کہ انہوں نے کوئی نئی بات نہیں کی بلکہ وہی کہا جو اخباروں میں پڑھا

پاکستان کی جانب سے عمر گل نے نویں نمبر پر بیٹنگ کرتے ہوئے ایک چھکے اور ایک چوکے کی مدد سے سولہ رنز بنائے۔ عمر اکمل سترہ رنز بنا کر نمایاں رہے۔ اسی طرح چودہ اوورز میں ہی انگلش گیند بازوں سائڈ بوٹم، براڈ، بریسنن اور سوان کی نپی تلی باؤلنگ نے پاکستانی ٹیم کا مجموعہ 89 رنز تک ہی محدود رکھا۔

انگلش ٹیم نے یہ آسان ہدف تیرہویں اوور میں چار وکٹوں کے نقصان پر حاصل کیا۔ ٹم بریسنن کو 3.4 اوورز میں دس رنز دے کر تین وکٹیں لینے پر کھیل کا بہترین کھلاڑی قرار دیا گیا۔ ٹوئنٹی ٹوئنٹی کی سیریز دو صفر سے جیتنے سے پہلے انگلینڈ کرکٹ ٹیم نے پاکستان کو ٹیسٹ سیریز میں ایک کے مقابلے میں تین میچوں میں کامیابی سے شکست دی تھی۔ پانچ میچز پر مشتمل ون ڈے سیریز کا آغاز پرسوں جمعے سے ہوگا۔

رپورٹ: شادی خان سیف

ادارت: عابد حسین