1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

پاکستان کے لئے تجارتی بنیادوں پر یورپی امداد کی توقع

سیلاب سے متاثرہ پاکستان کے لئے یورپی یونین کی جانب سے تجارتی بنیادوں پر امداد متوقع ہے، جس کا اعلان آئندہ ہفتے اس حوالے سے برسلز میں ہونےو الے خصوصی اجلاس میں کیا جا سکتا ہے۔

default

یورپی یونین کے وزرائے خارجہ کے دو روزہ غیررسمی اجلاس کے موقع پر یونین کی سربراہ برائے خارجہ امور کیتھرین ایشٹن نے کہا ہے کہ پاکستان کو وسیع تر امداد درکار ہے، جس میں امداد سے لے کر، اداروں کی تعمیر، دہشت گردی کے خلاف معاونت، تعمیرنو اور تجارت کے حوالے سے تعاون شامل ہے۔ انہوں نے کہا، ’سب متفق ہیں کہ ہمیں اس حوالے سے بھرپور غور کرنا ہوگا۔’

Westerwelle Porträt

جرمن وزیر خارجہ گیڈو ویسٹر ویلے

اس موقع پر جرمنی کے وزیر خارجہ گیڈو ویسٹر ویلے نے کہا، ’اگر ہم پاکستان کو مستحکم کرنا چاہتے ہیں کہ وہ انتہاپسندی اور بنیادپرستی کا گڑھ نہ بنے تو ہمیں اسے درپیش قدرتی آفت کے نتیجے میں پیدا ہونے والے معاشی مسائل کو حل کرنا ہوگا۔’

کیتھرین ایشٹن نے پاکستان کے لئے تجارتی ٹیرف میں خصوصی رعایتوں کی بھی تجویز دی۔

برطانوی سیکریٹری خارجہ ویلیم ہیگ نے کہا، ’تجارتی میدان میں پاکستان کی طویل المدتی مدد یورپی یونین کے مفاد میں ہے۔ مجھے اُمید ہے کہ اس حوالے سے 16 ستمبر کے اجلاس میں معاہدہ ہو جائے گا۔ وزرائے خارجہ نے بعض فیصلہ کن اقدامات کے لئے کھل کر حمایت کی ہے۔’

یورپی رہنما پاکستانی مصنوعات کو اپنی منڈیوں تک رسائی دینے کے لئے تین نکات پر غور کریں گے، جن میں سے کسی ایک کی منظوری دی جا سکتی ہے۔ ان میں کچھ مصنوعات کے لئے ڈیوٹی فری رسائی، ڈبلیو ٹی او کے معاہدے کے ساتھ یکطرفہ استثنیٰ کا فیصلہ، یا بعض مصنوعات کے لئے پسندیدہ ترین ریاست کے لئے مختص ٹیرف میں کمی شامل ہے۔

خبررساں ادارے AFP نے سفارتی ذرائع کے حوالے سے بتایا ہے کہ بیشتر یورپی ممالک محدود مصنوعات کے لئے استثنیٰ کے حق میں ہیں۔

NO FLASH Catherine Ashton Belgien EU Aussenministertreffen

یورپی یونین کی سربراہ برائے خارجہ امور

یورپین کمیشن نے وزراء سے 13 اقسام کی ٹیکسٹائل مصنوعات کے ٹیرف میں کمی پر غور کے لئے کہا ہے۔ اے ایف پی نے یورپی یونین کے ذرائع کے حوالے سے بتایا ہے کہ ان اقدامات کا مقصد پاکستان کو سالانہ ڈھائی کروڑ یورو تک کا مالی فائدہ پہنچانا ہے۔

پاکستان میں حالیہ سیلاب نے دوکروڑ سے زائد افراد کو متاثر کیا ہے جبکہ اس دوران 17سو سے زائد افراد ہلاک ہوئے۔

رپورٹ: ندیم گِل

ادارت: افسر اعوان

DW.COM

ویب لنکس