1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

پاکستان کا ویزا نہیں دیا گیا، انوپم کھیر

معروف بھارتی اداکار انوپم کھیر کا کہنا ہے کہ انہیں پاکستان کا ویزا نہ دیے جانے پر دکھ ہے۔ ان کی خواہش تھی کہ وہ کراچی کے ادبی میلے میں حصہ لیتے۔

بھارتی خبر رساں ایجنسی پریس ٹرسٹ آف انڈیا کی ایک رپورٹ کے مطابق فلمی صنعت کے نامور اداکار انوپم کھیر کو کراچی کے ادبی میلے میں شرکت کرنا تھی لیکن انہیں بھارت میں پاکستان کے سفارتخانے کی جانب سے ویزا جاری نہیں کیا گیا۔

انوپم کھیر ان 18 بھارتی شہریوں میں شامل ہيں، جنہیں عنقريب شروع ہونے والے کراچی کے ادبی میلے میں مدعو کیا گیا تھا لیکن صرف ان ہی کو ویزا نہیں دیا گیا۔ بھارت کے پدمہ بھوشن اعزاز حاصل کرنے والے انوپم کھیر نے مائکرو بلاگنگ کی ويب سائٹ ٹوئٹر پر اپنی ایک ٹوئيٹ میں لکھا، ’’بھارت میں پاکستانی فنکاروں کو خوش آمدید کیا جاتا ہے، جب کہ پاکستان بھارتی اداکاروں کے داخلے پر پابندی لگا رہا ہے۔‘‘

انوپم کھیر نے ایک اور ٹوئيٹ میں پاکستانی حکومت پر ویزا نہ دینے کے حوالے سے مزید تنقید کرتے ہوئے لکھا، ’’شاید مجھے ویزا اس لیے نہیں دیا گیا کیونکہ میں بھارت میں رواداری کی گہری روایات کے بارے میں بات کرتا ہوں یا پھر اس لیے کہ میں ایک کشمیری پنڈت ہوں۔‘‘

دوسری جانب بھارت میں پاکستانی ہائی کمیشن کی جانب سے کہا گیا ہے کہ انوپم کھیر نے ویزے کی درخواست ہی نہیں دی تھی۔

دريں اثناء انوپم کھیر نے کہا کہ انہيں ویزا نہ دیے جانے کی وجہ سے ادبی میلے کے منتظمین شرمندہ ہیں اور انہوں نے ان سے معافی بھی مانگی ہے۔

DW.COM