1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

پاکستان میں سیلاب کی اپیل پر بین الاقوامی رد عمل ناکافی

مون سون کی بارشوں سے پاکستان کے صوبہ پنجاب کے زیریں اور خاص طور پر صوبہ سندھ کے بالائی علاقوں میں سیلاب کے بعد کی صورت حال پر بین الاقوامی ردعمل کو اقوام متحدہ نے ناکافی قرار دیا ہے۔

default

اقوام متحدہ کی جانب سے کہا گیا ہے کہ پاکستان میں حالیہ ہفتوں کے دوران آنے والے سیلاب کے بعد تیس لاکھ افراد کو خوراک کی ضرورت ہے اور اس صورت حال کے حوالے سے بین الاقوامی برادری کی جانب سے مناسب جواب سامنے نہیں آیا ہے۔ عالمی ادارے کی جانب سے یہ بھی کہا گیا کہ جو بھی اب تک اس مناسبت سے کوششیں کی گئی ہیں وہ ناکافی ہیں۔

پاکستان مسلسل دوسرے سال شدید سیلاب کا سامنا کر رہا ہے۔ اسی برس ماہِ مئی میں دہشت گرد تنظیم القاعدہ کے لیڈر اسامہ بن لادن کی پاکستانی شہر ایبٹ آباد میں ہلاکت کے بعد پاکستان اور امریکہ کے درمیان پیدا شدہ کشیدگی کے بعد ایسے خدشات پیدا ہو گئے ہیں کہ جوہری طاقت کا حامل مسلمان ملک عالمی مرکزی دھارے سے کٹ کر نہ رہ جائے۔

Überflutung in Pakistan Flash-Galerie

سیلاب سے لاکھوں افراد متاثر ہیں

پاکستان میں سیلاب کے بعد کی صورت حال کے تناظر میں اقوام متحدہ کے ادارے ورلڈ فوڈ پروگرام کے ڈپٹی ایگزیکیٹو ڈائریکٹر  Ramiro Lopes da Silva کا کہنا ہے کہ  سیلاب کے بعد پیدا شدہ انسانی بحران عالمی برادری کی توجہ اپنی جانب مبذول کروانے سے قاصر رہا ہے۔ لوپیز ڈا سلوا کا کہنا ہے کہ سیلاب زدگان کے لیے گزشتہ سال کی طرح تیزی کے ساتھ فنڈ دستیاب نہیں ہو رہے ہیں۔ ان کا مزید کہنا تھا کہ امدادی اداروں کو اس وقت دنیا بھر میں ایسے چیلنجز کا سامنا ہے اور اس باعث وہ پاکستان کے سیلاب کے بعد کی صورت حال پر فوکس نہیں کر پا رہے ہیں۔

اقوام متحدہ کی جانب سے پاکستان کی سیلاب کی صورت حال کے حوالے سے جاری کی جانےوالی اپیل کے جواب میں صرف جاپانی حکومت نے دس ملین یورو کی امداد کا اعلان کیا تھا۔ اس اعلان کی اقوام متحدہ نے تصدیق کر دی ہے۔ اٹھارہ ستمبر کو اقوام متحدہ نے پاکستان کے لیے 357 ملین یورو کی امداد کی اپیل جاری کی تھی۔

پاکستانی حکومت کے مطابق رواں برس کے سیلاب میں  ہلاکتوں کی تعداد 350 تک پہنچ گئی ہے۔ جنوبی پاکستان کے میدانی علاقوں میں کھڑی فصلوں کی تباہی سے کروڑوں روپے کا نقصان بھی حکومت کو پہنچ چکا ہے۔ کل آٹھ ملین افراد متاثر ہیں۔ ورلڈ فوڈ پرگرام ادارے کے مطابق پاکستان میں سیلاب سے متاثرہ لاکھوں افراد مناسب خوراک اور پینے کے صاف پانی سے محروم ہیں۔

رپورٹ:  عابد حسین

ادارت:  حماد کیانی      

DW.COM