1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

پاکستان بھارت سے نمٹنا جانتا ہے، پاکستانی فضائیہ کے سربراہ

پاکستانی ایئر فورس کے سربراہ نے روایتی حریف ملک بھارت کو کشمیر کے تنازعہ کو ایک بھر پور جنگ میں تبدیل کرنے کے خلاف خبردار کیا ہے۔ ایئر چیف نے کہا ہے کہ پاکستانی افواج کو بھارت سے کوئی ڈر نہیں ہے۔

پاکستان کے جنوبی شہر کراچی میں آئیڈیاز نامی بین الاقوامی دفاعی نمائش میں پاکستان کے چیف آف ایئر سٹاف ایئر چیف مارشل سہیل امان نے خطاب کرتے ہوئے کہا، ’’ہمیں بھارت سے کوئی خطرہ نہیں ہے۔ بھارت کے لیے بہتر ہے کہ وہ تحمل کا مظاہرہ کرے۔‘‘

 پاکستانی چیف آف ایئر سٹاف نے یہ بیان ایک ایسے وقت میں دیا ہے جب ایک روز قبل ہی لائن آف کنٹرول پر مبینہ طور پر بھارتی فائرنگ کے باعث پاکستان کے تین فوجی ہلاک ہو گئے تھے۔ پاکستان کے مطابق گزشتہ روز بھارتی افواج کی فائرنگ کے نتیجے میں بارہ شہری بھی ہلاک ہو گئے تھے۔

نیوز ایجنسی اے پی کے مطابق پاکستانی فضائیہ کے سربراہ نے میڈیا سے گفتگو میں کہا، ’’ اگر نئی دہلی اس بحران کو بڑھانے کی کوشش کرے گا تو پاکستانی افواج بھی بھارت سے نمٹنا جانتی ہیں۔‘‘

 

پاکستان اور بھارت کے درمیان کشمیر کے معاملے پر دو جنگیں ہو چکی ہیں۔ دونوں ممالک کشمیر کو اپنے ملک کا حصہ تصور کرتے ہیں۔ اس برس کشمیری باغی نوجوان رہنما برہان وانی کی بھارتی افواج کی جانب سے ہلاکت اور اڑی حملے کے بعد سے دونوں ممالک میں تناؤ برقرار ہے اور دونوں ممالک کے درمیان کئی مرتبہ سرحد پر فائرنگ کا تبادلہ ہوا ہے جس کے نتیجے میں فوجیوں سمیت شہریوں کی ہلاکتوں ہوئیں۔