1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

پاکستانی ٹیم کا دورہء ویسٹ انڈیز: آفریدی کی عدم دستیابی

حالیہ کرکٹ ورلڈ کپ مقابلوں میں پاکستانی ٹیم کی قیادت کرنے والے کھلاڑی شاہد آفریدی نے اسی مہینے شروع ہونے والے قومی ٹیم کے دورہء ویسٹ انڈیز میں شامل نہ ہونے کا فیصلہ کیا ہے۔

default

شاہد آفریدی

کراچی سے موصولہ رپورٹوں میں پاکستان کرکٹ بورڈ کے ذرائع کا حوالہ دیتے ہوئے جمعرات کو رات گئے بتایا گیا کہ اس 31 سالہ سٹار آل راؤنڈر کے مطابق وہ 18 اپریل سے شروع ہونے والے پاکستانی ٹیم کے ویسٹ انڈیز کے دورے کے لیے دستیاب نہیں ہوں گے۔

پی سی بی کے ان ذرائع نے اپنا نام ظاہر نہ کرنے کی شرط پر خبر رساں ایجنسی روئٹرز کو بتایا کہ شاہد آفریدی نے پاکستان کرکٹ بورڈ کے چیئرمین کے ساتھ گفتگو میں کہا کہ وہ خود کو ذہنی طور پر اتنی اچھی حالت میں محسوس نہیں کرتے کہ قومی ٹیم کے ساتھ دورے پر کیربیین جا سکیں۔ روئٹرز کے مطابق آفریدی اس دورے کے لیے پاکستانی ٹیم میں ’بظاہر اس لیے شامل نہیں ہونا چاہتے کہ وہ فی الحال کرکٹ کے حوالے سے اپنے لیے ایک وقفے کے خواہش مند ہیں‘۔

Indien Cricketfan mit Hut

کرکٹ ورلڈ کپ میں پاکستان نے مجموعی طور پر اچھی کارکردگی کا مظاہرہ کیا

شاہد آفریدی نے سن 2010 میں ٹیسٹ کرکٹ سے ریٹائرمنٹ اختیار کر لی تھی مگر ان کے بارے میں توقع تھی کہ وہ پاکستانی ٹیم کے آئندہ دورہء ویسٹ انڈیز کے دوران ون ڈے اور ٹوئنٹی ٹوئنٹی میچوں میں کھیلیں گے۔

پاکستانی کرکٹ ٹیم نے شاہد آفریدی کی قیادت میں اپنا آخری ون ڈے میچ موجودہ کرکٹ ورلڈ کپ کے دوران تیس مارچ بدھ کے روز موہالی میں بھارت کے خلاف کھیلا تھا، جو اس ٹورنامنٹ کا دوسرا سیمی فائنل تھا اور جس میں بھارتی ٹیم پاکستان کو 29 رنز سے ہرا کر دو اپریل ہفتہ کے روز ہونے والے فائنل میں پہنچ گئی تھی۔ فائنل میں بھارت کا مقابلہ سری لنکا سے ہو گا۔

پاکستان کی طرف سے شاہد آفریدی اب تک 320 ون ڈے، 27 ٹیسٹ اور 42 ٹوئنٹئ ٹوئنٹی میچ کھیل چکے ہیں۔ محدود اووروں کے میچوں میں وہ گزشتہ برس سے پاکستانی ٹیم کی قیادت کر رہے تھے، جس میں ان کے ویسٹ انڈیز نہ جانے کی صورت میں اب وقفہ آ جائے گا۔

اپنے ویسٹ انڈیز کے دورے کے دوران پاکستانی ٹیم وہاں دو ٹیسٹ، ایک ٹوئنٹی ٹوئنٹی اور پانچ ایک روزہ میچ کھیلے گی۔

رپورٹ: مقبول ملک

ادارت: شامل شمس

DW.COM