1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

پاکستانی ٹیسٹ ٹیم کے کپتان بھی سرفراز احمد

پاکستان کرکٹ بورڈ ( پی سی بی) نے ٹی ٹوئنٹی اور ون ڈے کے بعد ملکی ٹیسٹ کرکٹ ٹیم کا کپتان بھی سرفراز احمد کو بنا دیا ہے۔ پی سی بی کے چیئرمین شہر یار خان نے یہ اعلان آج منگل چار جولائی کو ایک تقریب کے دوران کیا۔

پاکستانی وزیر اعظم نواز شریف نے انگلینڈ میں ہونے والی آئی سی سی چیمپئنز ٹرافی جیتنے پر قومی کرکٹ ٹیم کو اپنی سرکاری رہائش گاہ پر مدعو کیا تھا۔ اس دوران پی سی بی کے چیئرمین شہر یار خان نے تقریب سے خطاب کرتے ہوئے کہا، ’’میں اس موقع کا فائدہ اٹھاتے ہوئے یہ اعلان کرتا ہوں کہ ہماری ٹیسٹ ٹیم کے کپتان بھی سرفراز احمد ہوں گے۔‘‘ ذرائع کے مطابق اس اعلان سے قبل ہی سرفراز احمد کو پی سی بی نے اپنے اس فیصلے سے آگاہ کر دیا تھا۔

Großbritannien Cardiff Cricket Pakistan captain Sarfraz Ahmed and Mohammad Amir left celebrate winning the ICC Champions Trophy

سرفراز 36 ٹیسٹ میچوں میں پاکستان کی نمائندگی کر چکے ہیں

اپنی اس نئی ذمہ داری پر سرفراز احمد نے کہا، ’’ٹیسٹ ٹیم کی کپتانی کرنا میرے لیے اعزاز کی بات ہے۔ میں پوری کوشش کروں گا کہ قومی ٹیم کرکٹ کے تینوں فارمیٹس میں بہترین کارکردگی کا مظاہرہ کرے۔‘‘ سرفراز کے بقول چیمپئنز ٹرافی جیتنے پر ہی اکتفا نہیں کیا جائے گا اور کامیابیوں کا یہ سلسلہ اسی طرح سے جاری رہے گا۔

سرفراز احمد کو 2010ء میں ٹیسٹ ٹیم میں شامل کیا گیا تھا۔ وہ اب تک 36 ٹیسٹ میچوں میں 40.98 کی اوسط سے 2089 رنز بنا چکے ہیں، جن میں تین سنچریاں اور تیرہ نصف سنچریاں بھی شامل ہیں۔

آج منگل کو پاکستانی ٹیم کے اعزاز میں ہونے والی تقریب میں وزیر اعظم نواز شریف نے ٹیم کے ہر کھلاڑی کو دس ملین روپے اور ٹیم انتظامیہ کے ہر رکن کو پانچ ملین روپے دینے کا اعلان بھی کیا۔ پہلے سے طے شد پروگرام کے مطابق پاکستانی ٹیم اکتوبر میں متحدہ عرب امارات میں سری لنکا کے خلاف تین ٹیسٹ میچ کھیلے گی۔ یہ سیریز تیس سالہ سرفراز کے لیے بطور کپتان پہلا امتحان ثابت ہو گی۔