1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

ٹائمز سکوائر کا ناکام بم حملہ اور نئی گرفتاریاں

نیو یارک کے ٹائمز سکوائر ناکام کار بم حملے کے سلسلے میں پاکستان میں جاری تحقیقات کے نتیجےمیں تین مشتبہ افراد کی گرفتاری اور ان کو عدالت میں پیش کرنے پر امریکہ نے خوشی کا اظہار کیا ہے۔

default

نیو یارک کا ٹائمز سکوائر اور مشتبہ کار

پاکستانی حکام کے مطابق انسداد دہشت گردی قانون کے تحت ان افراد پر جلد ہی فرد جرم عائد کر دی جائے گی۔ حکومتی حکام کے مطابق ان مشتبہ افراد کو جولائی میں گرفتار کیا گیا تھا تاہم اب تک اس بارے میں کوئی اعلان نہیں کیا گیا تھا۔ بتایا گیا ہے کہ ان افراد پر الزامات عائد کئے گئے ہیں کہ انہوں نے ٹائم سکوائر ناکام کار بم حملے کے سلسلے میں فیصل شہزاد کو نہ صرف رقم مہیا کی تھی بلکہ پاکستان میں فیصل شہزاد اورطالبان باغیوں کے مابین ملاقات میں بھی معاونت کی تھی۔

اسلام آباد محکمہ پولیس کے نائب سربراہ بن یامین نے خبر رساں ادارے روئٹرز کو بتایا، ’’ ان افراد نے اقبال جرم کر لیا ہے کہ انہوں نے فیصل شہزاد کو مالی امداد فراہم کرنے کے علاوہ دیگر سہولتیں بھی دیں تھیں۔‘‘ بن یامین کے مطابق ان افراد کومنگل کو عدالت میں پیش کیا گیا، جہاں عدالت نے ان افراد کا چودہ روزہ ریمانڈ منظور کرلیا۔

Times Square Autobombe Anschlag

ٹائمز سکوائر میں کھڑی پولیس

نیویارک کے ناکام کار بم حملے کے مرکزی کردار فیصل شہزاد نے بھی امریکی وفاقی عدالت میں اقبال جرم کر لیا ہے اوراس مناسبت سے امریکہ میں عدالتی کارروائی کے ساتھ ساتھ تفتیشی عمل بھی جاری ہے۔

ٹائم سکوائر ناکام حملے کی تحقیقات کی سلسلے میں پاکستان میں ہونے والی گرفتاریوں پر امریکہ نے اطمینان کا اظہار کرتے ہوئے کہا ہے کہ وہ اس کیس کے حوالے سے پاکستانی سکیورٹی حکام کے ساتھ منظم طریقے سے کام کر رہے ہیں۔

اسٹیٹ ڈیپارٹمنٹ کے ترجمان پی جے کراؤلی نے کہا،’’ اس حوالے سے تحقیقات جاری ہیں تاہم ہم اس بات پر خوش ہیں کہ اس ضمن میں پاکستان میں گرفتاریاں عمل میں آئی ہیں۔‘‘ انہوں نے تاہم کہا کہ ان مشتبہ افراد کے مستقبل کا فیصلہ پاکستانی عدالتوں میں ہی ہوگا۔

پاکستانی سکیورٹی حکام کے مطابق گرفتار کئے گئے افراد کا تعلق تحریک طالبان پاکستان سے ہے۔ گرفتار شدگان کی شناخت شعیب مغل،شاہد حسین اور حنبل اختر کے نام سے کی گئی ہے۔ پولیس کے مطابق ان سے ٹائم سکوائر کے نقشے بھی برآمد ہوئے ہیں۔

رپورٹ: عاطف بلوچ

ادارت: عابد حسین

DW.COM

ویب لنکس