1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

ویلنگٹن ٹیسٹ: پاکستان کا اچھا آغاز

ویلنگٹن ٹیسٹ کے دوسرے دن کے اختتام تک پاکستان نے اپنی پہلی اننگز میں 134 رنز بنا لئے ہیں جبکہ اس کے دو کھلاڑی آؤٹ ہوئے ہیں۔ قبل ازیں نیوزی لینڈ کی ٹیم اپنی پہلی اننگز میں 356 رنز بنانے میں کامیاب ہو گئی تھی۔

default

نیوزی لینڈ کے کپتان ڈینئل ویٹوری

دوسرے دن کے اختتام تک میزبان ٹیم کو اس وقت 222 رنز کی سبقت حاصل ہے۔ دو ٹیسٹ میچوں کی سیریز کے اس دوسرے اور آخری ٹیسٹ میچ کے دوسرے دن جب پاکستان نے اپنی اننگز کا آغاز کیا تو اوپننگ کھلاڑی محمد حفیظ ایک کے انفرادی سکور پر آؤٹ ہو گئے۔

ساؤتھی کی ایک عمدہ گیند پر جب وکٹ کیپر ریسی ینگ نے ان کا کیچ پکڑا تو پاکستان کا مجموعی سکور صرف دو تھا۔ تاہم بعد ازاں توفیق عمر نے 70 جبکہ اظہر علی نے 62 رنز کی بدولت دن کے اختتام تک پاکستان کا سکور 134 رنز تک پہنچا دیا۔ توفیق عمر دوسرے دن کی آخری گیند پر گپٹل کو کیچ دے بیٹھے۔ انہیں نیوزی لینڈ کے کپتان ڈینئل ویٹوری نے آؤٹ کیا۔ ان دونوں نے دوسری وکٹ کی ساجھے داری میں 132 رنز جوڑے۔

Indien Umer Gul

عمر گل پاکستان کی طرف سے کامیاب ترین بولر رہے

اس سے قبل جب نیوزی لینڈ کی ٹیم نے پہلے دن کے سکور 246 چھ کھلاڑی آؤٹ پر اپنی اننگز دوبارہ شروع کی تو کپتان ویٹوری اور وکٹ کیپر بیٹسمن ریسی ینگ نے عمدہ کھیل کا مظاہرہ کیا۔ ینگ نے ستاون جبکہ ویٹوری نے 110 رنز کی عمدہ اننگز کھیلی۔ ویٹوری کی یہ دوسری ٹیسٹ سینچری تھی۔ ان دونوں کھلاڑیوں نے اپنی ٹیم کو اس مشکل وقت میں سہارا دیا، جب پاکستانی بولرز نے ایک مرتبہ پھر نیوزی لینڈ کی ٹیم کو پریشان کر دیا تھا۔ دونوں نے ساتویں وکٹ کی شراکت داری میں 138اہم رنز بنائے۔

پاکستان کی طرف سے عمر گل نے چار، تنویر احمد نے تین، عبدالرحمان نے دو جبکہ وہاب ریاض نے ایک وکٹ حاصل کی۔ وکٹ کیپر عدنان اکمل نے اس اننگز میں مجموعی طور پر چھ کیچ پکڑے۔ دو ٹیسٹ میچوں کی اس سیریز میں اس وقت پاکستان کو برتری حاصل ہے۔ پاکستان نے پہلے ٹیسٹ میچ میں نیوزی لینڈ کو دس وکٹوں سے شکست دی تھی۔

رپورٹ: عاطف بلوچ

ادارت: مقبول ملک

DW.COM