1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

نیوزی لینڈ میں بھیڑیں بھی قانون کی محافظ

نیوزی لینڈ کے جنوب میں پولیس سے بھاگنے والے چار ملزمان کو پولیس نے 90 منٹ کی دوڑ دھوپ کے بعد گرفتار کر لیا، مگر ان کی گرفتاری کی وجہ بھیڑیں تھیں۔

نیوزی لینڈ اپنی بھیڑوں کی وجہ سے پوری دنیا میں شہرت رکھتا ہے لیکن یہ کوئی نہیں جانتا تھا کہ یہ بے ضرر سا جانور امن و امان قائم رکھنے میں بھی مدد دیتا ہے۔ اس کا اندازہ ایک تازہ واقعے سے ہوتا ہے، جو سیاحتی علاقے کوئنز ٹاؤن کے نواح میں پیش آیا۔

پولیس سے بھاگنے والے چار ملزمان اپنی کار دوڑاتے جا رہے تھے اور پولیس پیچھا کر رہی تھی۔ یہ سلسلہ ڈیڑھ گھنٹے تک جاری رہا، مگر پھر ان مفرور ملزمان کے راستے پر بھیڑوں کا ایک غول آن کھڑا ہوا اور یہ ملزمان اپنی گاڑی آگے نہ بڑھا سکے۔

بتایا گیا ہے کہ گاڑی پر سوار چار ملزمان کا تیز رفتار تعاقب مرکزی اوٹاگو ضلع سے سیاحتی علاقے کوئنز ٹاؤن تک جاری رہا۔ پولیس کے مطابق ان ملزمان کوحد رفتار سے تیز گاڑی چلانے اور نمبر پلیٹ کی عدم موجودگی کی وجہ سے رکنے کے لیے کہا گیا، مگر انہوں نے گاڑی دوڑا دی اور پولیس نے تعاقب شروع کر دیا۔

اس تیز رفتار دوڑ میں ایک مقام پر بھیڑوں کی وجہ سے ان ملزمان کو گاڑی روکنا پڑی اور یوں یہ چاروں پولیس کے نرغے میں آ گئے۔ پولیس کے مطابق اس گاڑی میں سوار ایک مرد اور تین خواتین کو حراست میں لے لیا گیا ہے، جب کہ ان کے خلاف الزامات طے کیے جا رہے ہیں۔

مقامی ذرائع ابلاغ پر دکھائی جانے والی تصاویر میں پولیس نے ان ملزمان کو ہتھکڑیاں لگا رکھی ہیں، جب کہ آس پاس قریب ایک سو بھیڑیں کھڑی ہیں۔ بتایا گیا ہے کہ اس واقعے میں کوئی بھیڑ زخمی نہیں ہوئی۔ پولیس کے مطابق اس تمام کارروائی میں کئی پولیس کاریں استعمال کی گئیں۔

نیوزی لینڈ کی آبادی 4.6 ملین ہے جب کہ وہاں 30 ملین بھیڑیں بھی موجود ہیں۔