1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

نسل پرستی کے خلاف عالمی کانفرنس، قرارداد منظور

منگل کے روز اقوام ِ متحدہ نے نسل پرستی کے خلاف کانفرنس میں عدم برداشت اور نسل پرستی کے خلاف ایک قرارداد منظور کرلی ہے۔

default

اقوام متحدہ کے سیکریٹری جنرل بان کی مون نے افتتاحی سیشن کے بعد پریس کانفرنس سے خطاب کیا

کینیا کے اٹارنی جنرل اور اجلاس کے صدر ایموس واکو نے نسل پرستی کے خلاف قرارداد کی منظوری کو ایک تاریخی اقدام قرار دیا اور کہا کہ اگر بین الاقوامی برادری مثبت طریقے سے ایک دوسرے کے ساتھ تعاون کرے تو بہت سے متنازعہ مسائل پر اتفاق رائے ہوسکتا ہے۔

Proteste Ahmadinejad Antirassismus Konferenz in Genf

ایک نوجوان احتجاج کے طور پر جوکر کے روپ میں ایرانی صدر کے خلاف نعرے بازی کرتے ہوئے

اجلاس میں شریک مندوبین نے منگل کے روز بھی ایرانی صدر محمود احمدی نژاد کی اسرائیل مخالف تقریر پر تنقید کی اور کہا کہ یہ احمدی نژاد کی تقریر ہی تھی جس نے کانفرنس کے شرکاء کے عزم کو اس حد تک بلند کیا کہ پروگرام کے مطابق جمعہ کے روز منظور کی جانے والی دستاویز منگل کے روز ہی منظور کرلی گئی۔

اس کانفرنس میں ایرانی صدر محمود احمدی نژاد نے گزشتہ روز اپنے خطاب میں اسرائیلی حکومت کو نسل پرستانہ سوچ کی حامل قرار دیا تھا۔ ان کا کہنا تھا کہ فلسطینی علاقے پر اسرائیلی قبضہ ناجائز اور نسل پرستانہ ہے۔ احمدی نژاد کے اس بیان کو اقوام ِ متحدہ کے سیکریٹری جنرل کے علاوہ مغربی ممالک کی طرف سے بھی سخت تنقید کا سامنا کرنا پڑا تھا اور اجلاس میں موجود متعدد مغربی ملکوں کے مندوبین واک آؤٹ کرگئے تھے۔

یورپی یونین کے موجودہ صدر ملک چیک جمہوریہ نے بھی اجلاس سے واک آؤٹ کیا تھا تاہم دیگر ممالک کی طرح اس کے مندوب نے اجلاس میں دوبارہ شرکت نہیں کی اور ایرانی صدر کے بیان کو توہین آمیز قراردیا۔

Mahmoud Ahmadinejad Antirassismus Konferenz in Genf

ایرانی صدر نے اسرائیلی حکومت کو نسل پرست قرار دیا تھا

جرمنی سمیت کئی یورپی ممالک اور امریکہ نے صدر احمدی نژاد کی اس کانفرنس میں شمولیت پر اس اجتماع کا بائیکاٹ کررکھا ہے۔ برطانیہ، فرانس اور بیلجیئم البتہ اس اجلاس میں شریک ہیں۔

اس سے قبل اقوامِ متحدہ کی ایک ترجمان نے کہا تھا کہ ایرانی صدر محمود احمدی نژاد نے نسل پرستی کے خلاف عالمی ادارے کی کانفرنس میں اپنی تقریر کے ہولوکاسٹ کی نفی سے متعلق حصے حذف کردیےتھے۔ اس ترجمان کے مطابق صدر احمدی نژاد کی انگریزی میں تقریر میں یہ الفاظ موجود تھے کہ مغرب نے ہولوکاسٹ کے مبہم واقعات کو استعمال کرکے عرب سرزمین پراسرائیلی ریاست قائم کی، تاہم گزشتہ روز کانفرنس میں کی جانے والی فارسی میں اپنی تقریر میں انہوں نے یہ جملہ نکال دیا۔

Antirassismus Konferenz in Genf

امریکہ سمیت کئی ممالک نے کانفرنس کے بائیکاٹ کا اعلاب کیا تھا

ایرانی صدر کے جنیوا کانفرنس سے خطاب کے بعد مغربی ممالک کے ساتھ ایران کے تعلقات ابتر ہوگئے ہیں اور کشیدگی میں اضافہ ہوا ہے۔ ایرانی پارلیمان کے اسپیکر علی لاریجانی نے کہا ہے کہ صدر احمدی نژاد کی تقریر کو بہانہ بنا کر اسرائیل اگر ایران کی جوہری تنصیبات پر حملہ کرنے کا سوچتا ہے تو ایران اس کا سخت جواب دے گا۔

گذشتہ روز یروشلم میں ’ہولو کاسٹ میموریل ڈے‘ کے موقع پر اسرئیلی وزیرِ اعظم بین یامین نیتن یاہو نے بھی ایرانی صدر کی تقریر پر کڑی تنقید کی۔ اسرائیل نسل پرستی کے خلاف اس عالمی کانفرنس میں ایرانی صدر کے مدعو کئے جانے پر سوئٹزرلینڈ سے اپنے سفیر کو بھی احتجاجا واپس بلا چکا ہے۔

رپورٹ : شامل شمس

ادارت : مقبول ملک