1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

جرمن پارلیمانی انتخابات

میرکل اگلے چار برس تک چانسلر کے فرائض انجام دینے کے لیے پُرامید

جرمن چانسلر انگیلا میرکل نے اتوار کے روز ایک ٹیلی ویژن انٹرویو میں کہا ہے کہ وہ اگلے چار برس تک بہ طور چانسلر فرائض انجام دینے کی خواہش رکھتی ہیں۔

جرمنی میں رواں برس ستمبر میں منعقدہ عام انتخابات کے لیے انتخابی مہم جاری ہے اور میرکل چوتھی مرتبہ چانسلر کے عہدے کے لیے اپنی جماعت سی ڈی یو کی امیدوار ہیں۔ دوسری جانب ان کے مدمقابل یورپی پارلیمان کے سابقہ اسپیکر مارٹن شُلز ہیں جو سوشل ڈیموکریٹک پارٹی کے امیدوار ہیں۔

جرمن نشریاتی ادارے اے آر ڈی کو دیے اپنے انٹرویو میں چانسلر میرکل کا کہنا تھا، ’’کوئی نہیں جانتا کہ زندگی آپ کے سامنے کیا لانے والی ہے، مگر میں یقیناﹰ یہ چاہتی ہوں کہ اگلے چار برس تک بہ طور چانسلر فرائض انجام دوں۔‘‘

مہاجرین دوست پالیسیوں کی جانب سے اپنی جماعت کے رہنماؤں کی تنقید اور عوامی سطح پر مقبولیت کم ہونے کے باوجود میرکل اپنے موقف پر ڈٹی رہی تھیں اور حالیہ کچھ عرصے میں ان کی عوامی مقبولیت میں ایک مرتبہ پھر اضافہ دیکھا گیا ہے۔

Deutschland | ARD-Sommerinterview mit Angela Merkel (picture-alliance/AP Photo/M. Sohn)

میرکل نے جرمن نشریاتی ادارے کو انٹرویو دیا

میرکل نے اپنے اس انٹرویو میں مہاجرین کے بحران، سرمایہ کاری، ترکی کے ساتھ تعلقات اور نیٹو میں جرمن کردار کے موضوعات پر کھل کر بات کی۔

جرمن چانسلر میرکل نے باویریا میں سی ڈی یو کی سسٹر پارٹی سی ایس یو کی جانب سے بارہا کیے جانے والے ان مطالبات کو مسترد کر دیا تھا، جن میں کہا گیا تھا کہ ملک میں داخل ہونے والے مہاجرین کی ایک حد مقرر کی جانا چاہیے۔

انٹرویو میں ان کا کہنا تھا، ’’جہاں تک مہاجرین کی حد مقرر کرنے کا تعلق ہے، تو میرا موقف واضح ہے۔ میں یہ قبول نہیں کروں گی۔‘‘ انہوں نے تاہم کہا کہ ضوابط پر عمل کر کے مہاجرین کی تعداد کو کم کیا جا سکتا ہے جب کہ ان اُمور پر بھی اقدامات کی ضرورت ہے، جن کی وجہ سے لوگ مہاجرت پر مجبور ہوتے ہیں۔

ملتے جلتے مندرجات