1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

ممبئی نگری سے ہالی وُڈ تک کا سفر

بالی وُڈ کے زیادہ سے زیادہ سٹارز اب ممبئی نگری سے ہوتے ہوئے ہالی وُڈ پہنچنا شروع ہو گئے ہیں، جہاں بھارتی کرداروں کی گنجائش بڑھ رہی ہے۔ ایسی مثالیں ’سپائیڈر مین’ اور ’مشن ایمپوسیبل’ کی آئندہ سیریز میں دیکھنے کو ملیں گی۔

default

بپاشا باسو

شوبز کی دنیا میں اس بدلتی صورت حال کی وجہ سے بالی وُڈ کے منجے ہوئے ستارے مغرب میں کیریئر کے متلاشی ہیں۔ وہ اس انڈسٹری میں نام بنانا چاہتے ہیں، جس سے انہیں اپنے فنی کیریئر میں ہمیشہ تحریک ملتی رہی ہے۔

Irfan Khan

عرفان خان

’سلم ڈاگ میلینیئر’ کے اداکار انیل کپور کو ’مشن ایمپوسیبل’ کی آئندہ فلم میں ایک کردار مل گیا ہے۔ ’آ مائٹی ہارٹ’ میں انجیلنا جولی کے ساتھ دکھائی دینے والے عرفان خان ’سپائیڈرمین’ سیریز کی اگلی فلم میں دکھائی دیں گے۔ خبررساں ادارے روئٹرز نے بھارتی ذرائع ابلاغ کے حوالے سے بتایا ہے کہ عرفان خان کو آنگ لی کی آئندہ فلم ’لائف آف پی’ میں بھی کام مل گیا ہے۔

یہ کامیابیاں بالی وُڈ کے مردوں کو ہی حاصل نہیں ہوئیں، وہاں کی حسینائیں بھی اس حوالے سے پیش پیش ہیں۔ ان میں سے ایک ہیں بپاشا باسو، جن کا شمار بالی وُڈ میں صفِ اوّل کی اداکاراؤں میں ہوتا ہے۔ ان کی آنکھیں بھی مغرب پر لگی ہیں اور انہیں آسکر ایوارڈ یافتہ ہدایت کار رولنڈ جوفی کی فلم ’سنگولیرٹی’ میں کردار دیا گیا ہے۔

’سلم ڈاگ میلینیئر’ سے شہرت پانے والی فریدہ پنٹو بھی ’یو وِل میٹ آ ٹال، ڈارک سٹرینجر’ اور ’مرل’ میں مرکزی کرداروں میں دکھائی دیں گی۔

Abhishek Bachchan und Aishwarya Rai Bachchan Bollywood Schauspieler

ایشوریا رائے اپنے شوہر ابھیشک بچن کے ساتھ

رولنڈ جوفی کو اس کردار کے لئے بپاشا تک لانے والی کاسٹنگ ڈائریکٹر اُما کہتی ہیں، ’بھارتی فلموں کے ناظرین کی تعداد میں ہر روز اضافہ ہو رہا ہے، اور صرف بھارت میں ہی نہیں بلکہ امریکہ میں بھی۔‘

روئٹرز کے ساتھ گفتگو میں انہوں نے کہا، ’بھارتی فلموں کے ناظرین اپنے علاقائی رنگ سے خالی ہالی وُڈ کی ان فلموں کے مقابلے میں ایسی فلم زیادہ شوق سے دیکھیں گے، جس میں بپاشا باسو ہوں۔‘

بالی وُڈ کے اداکاروں کے لئے ہالی وُڈ میں مواقع ضرور بڑھ رہے ہیں، تاہم ان کا ہالی وُڈ کی فلموں میں نظر آنا کوئی ایسی نئی بات بھی نہیں ہے۔ اوم پوری، نصیرالدین شاہ اور امریش پوری بھی ان فلموں میں کام کر چکے ہیں۔ سابق مس ورلڈ ایشوریا رائے نے بھی ہالی وُڈ کی فلموں میں اداکاری کے جوہر دکھائے ہیں، لیکن ان میں سے کوئی بھی دوررس اثر نہیں چھوڑ سکا۔ یہ صورت حال یقینی طور پر ’سلم ڈاگ میلینیئر’ کے بعد تبدیل ہوئی ہے۔

رپورٹ: ندیم گِل

ادارت: امتیاز احمد

DW.COM