1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

معزول چیف جسٹس افتخار محمد چوہدری کی نظر بندی پر مقدمہ کروں گا:اعتزاز احسن

پاکستان سپریم کورٹ بار ایسوسی ایشن نے فیصلہ کیا ہے کہ معزول چیف جسٹس افتخار محمد چوہدری اور ان کی فیملی کو غیر قانونی اور غیر آئینی طور پر حراست میں رکھے جانے پر مقامی پولیس افسران سے لے کر صدر مشرف تک کے خلاف مقدمہ درج کروایا جائے گا۔

چار ماہ تک اپنے گھر پر نظر بند رہنے والے پاکستان سپریم کورٹ بار ایسو سی ایشن کے صدر اعتزاز احسن نے ان خیالات کا اظہار لاہور میں اپنے گھر پر ایک پریس کانفرنس کے دوران کیا۔ انہوں نے کہا کہ افتخارمحمد چوہدری اور ان کے گھر والوں کی غیر قانونی حراست میں ملوث تمام ذمہ دار افراد کے خلاف قانونی کاروائی ہونی چاہیے۔

اعتزاز احسن نے کہا کہ وہ اسلام آباد جا کر مقامی پولیش اسٹیشن پر مقدمہ درج کروائےں گے ۔ انہوں نے کہا´´ متعلقہ ایس ایچ او، ایس پی ، ڈی ایس پی ، آئی جی ، چیف کمشنر اسلام آباد ، ہوم سیکرٹری ، وزیر داخلہ ، سابق وزیر اعظم شوکت عزیز، نگران وزیر اعظم میاں محمدسومرو، اور جنرل پرویز مشرف کے خلاف تعزیرات پاکستان کے تحت بحثیت صدر سپریم کورٹ بار ایسوسی ایشن متعلقہ تھانے میں چیف جسٹس پاکستان ۔ ان کی بیگم ، ان کے بچوں کو چار ماہ سے زیادہ غیر آئینی ، غیر قانونی حراست میں رکھنے پر ایف آئی آر درج کرواﺅں گا``۔

اپنی رہائش گاہ پر صحافیوں سے گفتگو کے دوران انہوں نے کہا کہ یہ مقدمہ قابل دست اندازی پولیس ہے اور اس سلسلے میں بغیر کسی وارنٹ گرفتاری بھی عمل میںلائی جا سکتی ہے ۔ اعتزاز احسن نے مزید کہا کہ وہ کوشش کریں گے کہ پولیس اس مقدمے پر جلد ازجلد عمل بھی کرے ۔

اعتزاز احسن نے کہا کہ لانگ مارچ ملتوی ہوئی ہے لیکن اس کا یہ مطلب ہر گز نہیں کہ ہم احتجاج نہیں کریں گے ۔ انہوں نے کہا کہ وہ تمام سیاسی جماعتوں سے اس بات کی توقع رکھتے ہیں کہ وہ عدلیہ کی بحالی کے لئے اپنا بہترین کردار ادا کریں گے کیونکہ آزاد پارلیمان کے وجود کے لئے آزاد عدلیہ بھی ناگزیر ہے ۔

اعتزاز احسن نے کہا کہ عدلیہ کی بحالی کوئی مشکل کام نہیں بلکہ صرف وزیر داخلہ اور انسپکٹر جنرل پولیس کی دو منٹ کی میٹنگ یا ایک ٹیلی فون کال پر یہ مسلہ حل کیا جا سکتا ہے ، تاہم اس سلسلے میں پارلیمانی طریقہ کار ہی بہترین رہے گا اور ہم انتظار کریں گے کہ کب پارلیمان اپنا صحیح فیصلہ سنائے گی ۔

اس پریس کانفرنس میں اعتزاز احسن کے ساتھ ، پاکستان سپریم کورٹ بار ایسوسی ایشن کے سیکرٹری امین جاوید ، نائب صدر غلام نبی بھٹی ، اور اہم وکلاءراہنمایوں کے ہمراہ پاکستان پیپلز پارٹی اور پاکستان مسلم لیگ ن کے بھی راہنما موجود تھے ۔ پریس کانفرنس کے بعد اعتزاز احسن نوڈیرو کے لئے روانہ ہوگئے ۔

سکھر ائر پورٹ پر وکلاءبراداری سمیت دیگر شہریوں نے اعتزاز احسن کا والہانہ استقبال کیا۔ منگل کے دن اعتزاز احسن پاکستان پیپلز پارٹی کی مقتول راہنما بے نظیر بھٹو کی قبر پر پہلی مرتبہ حاضری دیں گے ۔

Audios and videos on the topic