1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

مشرقی جرمنی میں ٹرین حادثہ، کم از کم 11 افراد ہلاک

ہفتے کی شب مشرقی جرمن صوبے سیکسنی انہالٹ میں ایک مسافر ٹرین کے حادثے میں کم از کم گیارہ افراد ہلاک جبکہ 20 سے زائد زخمی ہو گئے۔

default

وفاقی جرمن پولیس کے مطابق یہ حادثہ اس وقت پیش آیا، جب اوشرس لیبین کے قریب واقع ہورڈورف کے علاقے میں ایک ریجنل ٹرین ایک مال گاڑی سے ٹکرا گئی۔ زخمیوں کی تعداد کے حوالے سے متضاد خبریں سامنے آ رہی ہیں۔

Zugunglück in Frankreich

حادثے میں متعدد افراد زخمی بھی ہوئے

حکام کے مطابق حادثے میں بہت سے افراد معمولی زخمی بھی ہوئے جبکہ تصادم کے نتیجے میں دونوں گاڑیوں کو آگ لگ گئی اور مسافر بردار ٹرین پٹری سے اتر گئی۔ ماگڈے برگ سے ہالبرشٹڈٹ جانے والی ہیرس ایلبے ایکسپریس HEX ہفتے کے روز کی آخری ٹرین تھی۔ ان دنوں شہروں کے درمیان سنگل پٹری ہے۔ تاہم ابتدائی طور پر حادثے کی وجہ سامنے نہیں آئی ہے۔ ایسی اطلاعات بھی ہیں کہ اس پٹری پر رات کے وقت مرمت کا کام بھی جاری تھا۔

شمال مشرقی جرمنی میں HEX چلانے والے ادارے Veolia گروپ کے ترجمان نے بھی ابتدائی طور پر اس حادثے کی وجوہات نہیں بتائی ہیں۔ ترجمان کے مطابق اس ٹرین میں 100 افراد کی گنجائش تھی، تاہم یہ معلوم نہیں کہ حادثے کے وقت اس میں کتنے مسافر سوار تھے۔ دریں اثناء پولیس حکام کے مطابق حادثے کے وقت ٹرین میں 40 مسافر سوار تھے۔

حادثے کے بعد اس پٹری کو ٹرین ٹریفک کے لئے بند کر دیا گیا جبکہ خصوصی بسوں کے ذریعے مسافروں کو ان کی منزلوں کی جانب روانہ کیا گیا۔ حادثے کا شکار ہونے والی مال گاڑی بھی ایک نجی کمپنی کی ملکیت ہے۔

حادثے کے بعد فائربریگیڈ اور پولیس اہلکاروں کی بڑی تعداد جائے حادثہ پر پہنچ گئی۔ امدادی کاموں میں تقریبا 150 افراد شریک ہوئے۔

رپورٹ : عاطف توقیر

ادارت : عدنان اسحاق

DW.COM

ویب لنکس